2020-11-30 [10:43 AM]

ئەندامێکی پەرلەمانی کوردستان، لە فراکسیۆنی پارتی دیموکراتی کوردستان رایگەیاند، کە ئێستادا ھەرێمی کوردستان بەقۆناغێکی سەختی ئابووریدا گوزەر دەکات، بەلام دەبێت لەو راستیەش حالی بین کێشەکانی نێوان ھەولێر و بەغدا کێشەی دارایی و مووچە وبودجە نیە بەلکو کێشەی سیاسی و نەتەوەیی و دەستوورییە.

وەیسی سەعید وەیسی، ئەندامی پەرلەمانی کوردستان، لە فراکسیۆنی پارتی دیموکراتی کوردستان، بە ئاژانسی ھەواڵی زاگرۆسی راگەیاند: دوای رووخانی رژێمی بەعس لەساڵی ٢٠٠٣ خەلکی کوردستان چاوەروانبوون عیراقێکی تازە لەسەر بنەمای  شەراکەت و تەوافوق و ھاوسەنگی، بنیات بندرێت تا ئەرک و مافی کوردستانیان دیاری بکرێت، بەلام بەداخەوە دوای تێپەربوونی کاتەکان بەھەمان بیرکردنەوەی بەعس ئاسا مامەلە یانکرد، بەمەش دەرکەوت ھەلگری ھەمان فەرھەنگی شۆڤێنیە پێگەی ھەرێمی کوردستانیان نادیدەگرت لەدوای رووخانی رژێمی بەعس کە ھەمیشە کوردستان ئارام ترین و سەقامگیرترین شوێن بووە بۆیان لە کاتێکدا لە دەستووری ھەمیشەیی عیراقدا مافی کوردوەک ھاوبەشی سەرەکی جێگرکراوە کە چاوەروان دەکرا ھەموو گەلانی عیراق لە ژێر چەتری دەستووردا بحەسێنەوە، بەڵام بە داخەوە ھەر رۆژێ بەبیانویەک گرفت و لەمپەر لە بەرامبەر مافەکانی گەلی کوردستان دروست دەکەن و پێشێلی دەستوور دەکرێت زیاتربە تاکرەویی و خۆسەپاندن حکوم دەکەن کە بە دلنیایەوە ئەمەش لەبەرژەوەنی عیراق نەبێت.

ئەندامی پەرلەمانی کوردستان، لە فراکسیۆنی پارتی دیموکراتی کوردستان گووتی: راستە لە ئێستادا ھەرێمی کوردستان بەقۆناغێکی سەختی ئابووریدا گوزەر دەکات، بەلام دەبێت لەو راستیەش حالی بین کێشەکانی نێوان ھەولێر و بەغدا کێشەی دارایی و مووچە وبودجە نیە بەلکو کێشەی سیاسی و نەتەوەیی و دەستوورییە، کە بە درێژایی مێژووش کێشەی رەوای گەلەکەمان زۆر لە کێشەی مووچە گەورەتربووە، چونکە نان و مووچە یەکێکە لە سادەترین مافی ھەر مرۆڤێکە، ئەم ھەنگاوانەی لەماوەی رابردوودا لە ئەنجوومەنی نوێنەرانی عیراق دەرحەق بە ھەرێمی کوردستان پەیرەوکران بەئاشکرا پێچەوانەی دەستوور و سیستەمی تەوافوق وشەراکەت بوون، کە ئامانجی دووژمنانیش لەو ھەموو بەربەستانە روون و ئاشکرایە کە دەیانەوێت ئیرادەی تاکی کورد بشکێنێت و بەپرسی دارایی سەرقالمان بکات و لە بابەتە نەتەوەیی و نیشتیمانییەکان دوورمان بخەنەوە.

ھەروەھا وەیسی سەعید وەیسی، ئەندامی پەرلەمانی کوردستان، لە فراکسیۆنی پارتی دیموکراتی کوردستان ئەوەشی بۆ ئاژانسی ھەواڵی زاگرۆس خستەروو، کە گرنگە بەرگەی سەختیەکان بگرین و بەئیرادەی پۆلاین رووبەررووی سەختیەکان ببینەوە، چونکە مێژوو سەلماندوێتی ھیچ کات گەلی کوردستان ژیانی زەلیل و ژێردەستەیی قبول ناکات و رۆژە سەختەکانیش تێدەپەرن، کە حکوومەتی ھەرێمی کوردستان سەرقالی گفتوگۆکردنە بۆ چارەسەرکردنی کێشەکان لەگەل حکوومەتی فیدرال بەجۆرێک سازش لەسەر مافەدەستورییەکان و شایستە داراییەکانی خەلکی کوردستان نەکرێت، ھەرچەندە ژمارەێک پەرلەمانتاری کورد بووینە بەشێک لە دژایەتی کردنی ھەرێمی کوردستان ھیچ جیاوازێکیان نیە لەگەل ئەو بە کرێ گیراوانەی پێشتر بەپێش رژێمی لەناوچووی بەعس دەکەوت بۆتێکدان و سووتاندنی کوردستان کە ھەموو ھەولەکانیان نەزۆکن و سەرناگرن بەلکو تەنھا بۆ خۆدەرخستن و موزایەدەی سیاسی و ھەلمەتی پێش وەختەی ھەلبژاردنە.

رێباز یونس