2021-01-16 [04:48 AM]

بەڕێزان/ سەرپەرشتیاری گشتی و ستافی بەڕێوەبردنی دەزگای سەتەلایتی کوردستان..

بەبۆنەی(٢٢) ھەمین ساڵیادی دامەزراندنی کەناڵی ئاسمانیی کوردستان(Ktv)گەرمترین پیرۆزبایی ئاراستەی ئێوەی بەڕێز و سەرجەم کادیر و کارمەندان و بینەرانی ئازیزی کەناڵەکەتان دەکەین و، ھیوای بەرەوپێشچوون و سەرکەوتنی زیاترتان بۆ دەخوازین.
 کەناڵی ئاسمانی کوردستان، کە بە بڕیار و سەرپەرشتی راستەوخۆی سەرۆک مەسعود بارزانی دامەزرا،  ھەمیشە خاوەن پەیامی روون و راستگۆیانەی خۆی بووە و لەو تەمەنە پڕ بەخششەی توانیویەتی بە بەرنامە و پلانێکی رێکوپێک و بەگیانی بەرپرسانە و دڵسۆزانە خزمەت بە دۆزی رەوای گەلەکەمان بکات.

کەناڵی ئاسمانی کوردستان، بە ھەوڵ و کۆششی بێوچانی بەرپرس و میدیاکارانی، پیشەوەرانە مامەڵەی لەگەڵ بابەت و ھەواڵ و رووداوەکاندا کردووە و، لە خزمەتکردن و جێبەجێکردنی ئەرکەکانی بۆ ھێنانەدی خواست و ویستی بینەران و ھاووڵاتیان دریغی نەکردووە. 

رۆڵ و کاریگەری میدیا لەو رەوشە ھەستیار و گرنگەی ئەمڕۆماندا زۆر بایەخدارە، بەتایبەتیش میدیای بینراو، دیارە لەو رووەوەش (Ktv) ھەمیشە شانبەشانی کەناڵەکانی دیکەی میدیایی لەخۆبردووانە و ماندوونەناسانە بە ئەرکی پیرۆزی خۆی ھەستاوە کە مایەی رێز و دەستخۆشیە.  
 
لەم یادەدا جەخت لەسەر گرنگی ئەرکی ئێوە و گشت کەناڵەکانی دیکەی میدیایی دەکەینەوە کە بەوپەڕی راستگۆیی و پیشەوەرانە و خەمخۆرنە لە ئاست بەرپرسیاریەتی سەرشانتاندابن بۆ خستنەڕووی کێشە و کەموکوڕیەکان و، ھاوکات قووڵکردنەوەی گیانی پێکەوەژیان و برایەتی و تەبایی و یەکڕیزی لە ناو کۆمەڵگەی کوردستانیدا.

 جارێکی دیکە وێرای سوپاسگوزاری و دەسخۆشیمان پشتیوانی تەواوی خۆمان بۆ بەرەوپێشچوونی دەزگاکەتان وەک دامەزراوەیەکی میدیایی ھاوچەرخ و پرۆفیشناڵ دووپات دەکەینەوە و، ئومێدەوارین ھەر لەپێشکەوتن و سەرکەوتندابن. 

مەکتەبی سیاسی
پارتی دیموکراتی کوردستان
١٦ـی١ـی٢٠٢١