English | عربی | Kurdî دواهەواڵ
ڕاستەوخۆ  
 
ناوه‌ڕۆكی یاسای سه‌رۆكایه‌تیی هه‌رێم كه‌ ئه‌مڕۆ له‌ په‌رله‌مان په‌سه‌ندكرا
2019-05-08 [02:34 AM]

ZNA - هه‌ولێر


 

ئه‌مڕۆ چوارشه‌ممه‌ كۆبوونه‌وه‌ی په‌رله‌مانی كوردستان، بۆ خوێندنه‌وه‌ی سێیه‌م بۆ هه‌مواری یاسای كاراكردنه‌وه‌ی دامه‌زراوه‌ی سه‌رۆكایه‌تی هه‌رێمی كوردستان ده‌ستیپێكردوو كه‌ تێیدا به‌ زۆرینه‌ى ده‌نگى په‌رله‌مانتاران یاساكه‌ په‌سه‌ند كرا.

 

ئه‌و پڕۆژه‌یاسایه‌ به‌ په‌سه‌ندكردنی له‌ په‌رله‌مان بوو به‌ یاسای ژماره‌ "1"ی ساڵی 2019 به‌ ناوی "یاسای كاراكردنه‌وه‌ی دامه‌زراوه‌ی سه‌رۆكایه‌تیی هه‌رێمی كوردستان - عێراق و هه‌مورای شێوازی هه‌ڵبژاردنی سه‌رۆك تا په‌سه‌ندكردنی ده‌ستوور".

 

یاساكه‌ له‌ 8 مادده‌ پێك هاتووه‌ و به‌ گوێره‌ی مادده‌ی یه‌كه‌م، یاسای هه‌لپه‌ساردنی دامه‌زراوه‌ی سه‌رۆكایه‌تیی هه‌رێمی كوردستان - عێراق ژماره‌ 10ی ساڵی 2018 هه‌ڵده‌وه‌شێته‌وه‌ و دامه‌زراوه‌ی سه‌رۆكایه‌تیی هه‌رێم كارا ده‌كرێته‌وه‌.

 

له‌كاتێكدا مادده‌ی دووه‌می ئه‌و یاسایه‌ تایبه‌ته‌ به‌ دابه‌شكردنی ده‌سه‌ڵاته‌كانی سه‌رۆكایه‌تیی هه‌رێم به‌سه‌ر دامه‌زراوه‌ ده‌ستوورییه‌كان، هه‌رچی مادده‌ی سێیه‌می ئه‌و یاسایه‌شه‌، له‌ دوو بڕگه‌ پێك هاتووه‌، بڕگه‌ی یه‌كه‌میان تایبه‌ته‌ به‌ ده‌سه‌ڵاته‌كانی سه‌رۆكی هه‌رێم و بڕگه‌ی دووه‌میش تایبه‌ته‌ به‌ ژماره‌ی جێگره‌كانی سه‌رۆكی هه‌رێم، كه‌ ئاماژه‌ به‌وه‌ ده‌دات، "سه‌رۆكی هه‌رێم دوو جێگری ده‌بێت و ئه‌رك و ده‌سه‌ڵاته‌كانیان له‌لایه‌ن سه‌رۆكی هه‌رێمه‌وه‌ دیاری ده‌كرێن".

 

مادده‌ی چواره‌می یاساكه‌ش له‌ دوو بڕگه‌ پێك هاتووه‌ و تایبه‌ته‌ به‌ رێككاره‌كانی هه‌ڵبژاردنی سه‌رۆكی هه‌رێم، بڕگه‌ی یه‌كه‌می ئه‌و مادده‌یه‌ 6 خاڵ له‌خۆ ده‌گرێت، كه‌ پێكهاتوون له‌: "دیاریكردنی واده‌ی خۆپاڵاوتن بۆ سه‌رۆكایه‌تیی هه‌رێم، مه‌رجه‌كانی خۆپاڵاوتن، داخستنی ده‌رگای خۆپاڵاوتن و راگه‌یاندنی ناوی ئه‌و كه‌سانه‌ی مه‌رجی یاساییان تێدایه‌، ماوه‌ی تانه‌لێدانی ئه‌و پاڵێوراوانه‌ی‌ ناویان نه‌گه‌ڕاوه‌ته‌وه‌ كه‌ ماوه‌كه‌ی ته‌نیا 2 رۆژه‌، میكانیزمی هه‌ڵبژاردنی سه‌رۆك كه‌ به‌ ده‌نگدانی ئاشكرا و زۆرینه‌ی ره‌ها ده‌بێت، هه‌روه‌ها خاڵی شه‌شه‌میش تایبه‌ته‌ به‌وه‌ی، ئه‌گه‌ر هیچ كاندیدێك زۆرینه‌ی ره‌های به‌ده‌ست نه‌هێنا، هه‌ڵبژاردن دووباره‌ ده‌كرێته‌وه و ئه‌گه‌ر ته‌نیا یه‌ك كاندیدیش بۆ ئه‌و پۆسته‌ هه‌بوو، ئه‌وا به‌ ده‌نگدانی ئاشكرا هه‌ڵده‌بژێردرێت‌".

 

بڕگه‌ی دووه‌می مادده‌ی چواره‌میش تایبه‌ته‌ به‌م خوله‌ و دوای 3 رۆژ له‌ ده‌رچوونی ئه‌م یاسایه‌، ده‌رگای خۆپاڵاوتن بۆ پۆستی سه‌رۆكی هه‌رێم ده‌كرێته‌وه‌.

 

هه‌رچی مادده‌ی پێنجه‌می ئه‌م یاسایه‌یه‌، كه‌ له‌ دوو بڕگه‌ پێك هاتووه‌، له‌ بڕگه‌ی یه‌كه‌مدا جه‌خت كراوه‌ته‌وه‌، "ماوه‌ی ویلایه‌تی سه‌رۆكی هه‌رێم به‌ كۆتاییهاتنی ماوه‌ی ویلایه‌تی په‌رله‌مان كۆتایی دێت"، له‌كاتێكدا له‌ بڕگه‌ی دووه‌می ئه‌و مادده‌یه‌دا دووپات كراوه‌ته‌وه‌، "سه‌رۆكی هه‌رێم له‌ ئه‌رك و ده‌سه‌ڵاته‌كه‌ی ده‌مێنێته‌وه‌، تا به‌پێی حوكمه‌كانی ئه‌م یاسایه‌ سه‌رۆكێك هه‌ڵده‌بژێردرێت".

 

به‌ گوێره‌ی مادده‌ی شه‌شه‌می ئه‌م یاسایه: "كار به‌ هیچ ده‌قێكی یاسایی، یان بڕیارێك ناكرێت كه‌ له‌گه‌ڵ حوكمه‌كانی ئه‌م یاسایه‌ ناكۆك بێت"، له‌كاتێكدا مادده‌ی حه‌وته‌می یاساكه‌ پێداگیریی له‌سه‌ر ئه‌وه‌ ده‌كات، كه‌ "پێویسته‌ له‌سه‌ر لایه‌نه‌ په‌یوه‌ندیدیداره‌كان حوكمه‌كانی ئه‌م یاسایه‌ جێبه‌جێ بكه‌ن" و مادده‌ی هه‌شته‌میش جه‌خت ده‌كاته‌وه‌، "ئه‌م یاسایه‌ له‌ رۆژی ده‌رچوونییه‌وه‌ جێبه‌جێ ده‌كرێت و له‌ رۆژنامه‌ی فه‌رمیی وه‌قایعی كوردستان بڵاو ده‌كرێته‌وه‌".  

 

ئه‌مڕۆ په‌رله‌مانی كوردستان به‌ سه‌رۆكایه‌تیی دكتۆره‌ ڤالا فه‌رید، سه‌رۆكی په‌رله‌مان و هه‌ریه‌ك له‌ هێمن هه‌ورامی، جێگری سه‌رۆكی په‌رله‌مان و مونا قه‌هوه‌چی، سكرتێری په‌رله‌مان به‌ڕێوه‌ چوو و پڕۆژه‌ی پێشنیازی كاراكردنه‌وه‌ی دامه‌زراوه‌ی سه‌رۆكایه‌تیی هه‌رێمی كوردستان په‌سه‌ند كرا.





ئەم هەواڵە 4078جار خوێندراوەتەوە
 
 
ڤیدیۆ گەلەری
چەند بیرۆکەیەک بۆ ڕزگاربوون لە گەرمای ھاوین
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad