English | عربی | Kurdî دواهەواڵ
ڕاستەوخۆ  
 
ئه‌مڕۆ 45 ساڵ به‌سه‌ر له‌ سێداره‌دانی شه‌هيد له‌یلا قاسم و هه‌ڤاڵانى تێده‌په‌ڕێت
2019-05-12 [08:03 AM]

ZNA-هەولێر


 

شه‌هيد له‌یلا قاسم، ساڵی 1952 لە گوندی بامیلی سەر بە شاری خانەقین لە خێزانێکی ھەژار و نیشتمانپەروەری کورد لەدایک بووە. لەیلا قاسم بۆ یەکەمجار لە ساڵی 1958 لە شاری خانەقین چووەتە بەر خوێندن و قۆناغەکانی سەرەتایی و دواناوەندی لەو شارە تەواو کردووە. لەیلا لە ساڵی 1971دا لە بەشی کۆمەڵناسيی کۆلێژی ئادابی زانکۆی بەغدا وەرگیراوە، وه‌ك هه‌ر كوردێكى نەته‌وه‌په‌روه‌ر، زوڵم و زۆرداری رژێمی عێراق لەسەر گەلی کورد، بیری ئازادیخوازانە و خەبات و تێکۆشانی لەلای لەیلا قاسم دروست کردوه‌.

لە سەرەتای ساڵەکانی 1970 کە گەلی کورد لە باشووری کوردستان بە قۆناغێکی ھەستیاردا تێپەڕ دەبوو، لەیلا قاسم و هه‌ڤاڵانى، سەرباری نکۆڵیکردنی رژێمی بەعس لە ھەبوونی گەلی کورد، ئەوان سووربوون لە خەبات و تێکۆشان بۆ بەدەستھێنانی مافەکانی گەلەکەیان. لە ئاداری 1974دا دوای دەستپێکردنەوەی شەڕ و ھێرشکردنەوەی رژێمی عێراق بۆسەر ناوچەکانی کوردستان، رژێمی بەعس دەستیکرد بە راگوێزانی ھەزاران کورد و بۆردومانکردنی ھەردوو شاری قەڵادزێ و ھەڵەبجە و راوەدونان و گرتنی رۆشنبیران و قوتابیان و ئازادیخوازانی کورد.

دەزگا ھەواڵگرییەکانی رژێمی بەعس لە رۆژی 28-4-1974، لەیلا قاسم و چوار لە هه‌ڤاڵانى (جەواد ھەمەوەندی، نەریمان فوئاد مەستی، حەسەن حەمەڕەشید و ئازاد سلێمان میران) لە ئەنجامی ھەڵمەتێکی بەرفراوانی ھێزە ئه‌منی و سەربازییه‌كانی رژێم لە بەغدا دەستگیر کران. 

لەیلا قاسم له‌ وەڵامی پرسیارەکانی بەڕێوەبەری دەزگای ھەواڵگری بەعس له‌كاتى لێكۆڵينه‌وه‌دا بێباکانە گوتی: "بە کوشتنی من ھەزاران کورد لە خەوی نەزانی هۆشیار دەبنەوە، زۆر خۆشحاڵ و سەربەرزم کە گیانم فیدای رێی رزگاری کوردستاندا دەکەم".

رژێمی بەعس بە مەبەستی چاوترساندنی لاوان و قوتابیان و توێژى رۆشنبیری کورد و گه‌لى كوردستان، به‌ خێرایی دوای دەستگیرکردنیان حوكمێكى نادادوەرانەى دژ بە لەیلا قاسم و هه‌ڤاڵانى دا و بڕیاری لەسێدارەدانی بۆ دەرکردن. 

کاتژمێر 7ی سەرلەبەیانی رۆژی 12-5-1974، لەیلا قاسم و ھەر چوار هه‌ڤاڵه‌كه‌ى لەسێدارەدران.

كۆمه‌ڵێك له‌ چاپەمەنییەکانی ئەوسای جیھان، ھەواڵی لە سێدارەدانی "لەیلا قاسم"یان وەک لەسێدارەدانی یەکەم ژن لە مێژووی سیاسی عێراقدا بڵاوکرده‌وە.

هه‌زاران سڵاو له‌ گيانى پاكى شه‌هید له‌یلا قاسم و هه‌ڤاڵانى و سه‌رجه‌م شه‌هیدانی رێگای رزگارى كورد و كوردستان.





ئەم هەواڵە 1225جار خوێندراوەتەوە
 
 
ڤیدیۆ گەلەری
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
ڤیدیۆیی .... بە ئاگر و شمشێر قژی ئافرەتان رێکدەخات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad