English | عربی | Kurdî دواهەواڵ
ڕاستەوخۆ  
 
گرژیێن دناڤبه‌ڕا ئێران و ئه‌مریکا، گڕژێن دناڤبه‌ڕا ۲ حکومه‌تانه‌ یان گڕژیێن دناڤبه‌ڕا سه‌رکرده‌یێن سیاسی و سه‌ربازینه‌؟
2019-05-18 [03:09 AM]

نڤیسینا: پاوان تەتەر نێروەیی


په‌یوه‌ندیێن دناڤبه‌را ویلایه‌تێن ئێکگرتیێن ئه‌مریکا و ئێرانێ تاکو دهێت ئالوزتڕ دبن و تاکو گه‌هشتیه‌ وی ئاستی کو زه‌نگا مه‌ترسیێ ژ لایێ سازیێن نیڤده‌ووله‌تی هاتیه‌ لێدان ژ بو ئه‌گه‌رێ سه‌رهه‌لدانا شه‌ڕ دناڤبه‌را ڤان هه‌ردوو وه‌لاتێن ناڤهاتی. هه‌ر چه‌نده‌ دژایه‌تیکرنا رژێما ئێرانێ ژ لایێ کابینه‌یا دوناڵد ترامپیڤه‌ هه‌ر ژ ئێکه‌م روژا هاتنه‌ سه‌رده‌سهه‌لاتا ترامپیڤه‌ هه‌بوویه‌ لێ لوی ده‌می ژ ئه‌گه‌رێ هه‌بوونا رێکه‌فتننامه‌یا ئه‌تومیا دناڤبه‌را ئێرانێ و وه‌لاتێن روژئاڤایی ئه‌گه‌ڕێ شه‌ڕ کێمتڕ بویه‌ لێ به‌لێ نوکه‌ ژ ئه‌گه‌ڕێ پاشکه‌زبوونا ئه‌مریکا ژ ڤێ رێکه‌فتننامه‌یێ تاکو ده‌ێت ده‌نگێ دهوڵا شه‌ڕ نێزیکتڕ دبیت و ئه‌ڤ چه‌نده‌ ڤه‌دگه‌ریته‌ڤه‌ بو ڤان گورانکاریێن بله‌ز یێن ئه‌مریکایێ د ناوچێدا بتایبه‌تی ژی د ئاڤێن خه‌لیجیدا، و نمنونه‌ هنارتنا که‌شتیا شه‌ڕ یا بناڤێ ئابراهام لینکوون کو به‌س د شه‌ڕێن هه‌ڕه‌ مه‌زن جوڵه‌ پێدهێته‌کرن و بکارئانین و هنارتنا فروکه‌یێن شه‌ڕ یێ جوڕێ B52 کو هه‌لگرێن کلاڤوکێن ئه‌تومینه. کو ئه‌ڤ چه‌نده‌ ژ لایێ ئه‌مریکاڤه‌ دهێته‌باسکرن کو ژ بو ئارمانجا پاراستنا هێزێن وه‌لاتێ وان و به‌رژه‌وه‌ندیێن ئه‌مریکانه‌ د ناوچێدا و ئه‌مریکا ئێرانێ تومه‌تباڕ دکه‌ت ب کار ئینانا لایه‌نێ سێیه‌م وه‌که‌ مه‌ترسی و هێرشکرنێ بو سه‌ر به‌رژه‌وه‌ندی و هێزێن ئه‌مریکی. نوکه‌ گه‌هشتیه‌ و ئاستی کو ئه‌مریکا داخوازێ ژ وه‌لاتێ ناوچێ بکه‌ت بو بکارئینانا خاکا وان وه‌لاتان ژ بو جێگیرکرنا هێز و موشه‌کێن شه‌ڕ و ئیمارات و سعودیه‌ ده‌رگه‌هان ڤالا دکه‌ن ژ بو ڤان هێزان هه‌م ژ لایێ بکارئینانا خاکا ڤان وه‌لاتان هه‌م ژ لایێ بکارئینانا ئاڤ و به‌نده‌ڕێن وان. هه‌ردوو وه‌لات ئاماژێ بوێ چه‌ندێ دکه‌ن کو شه‌ڕی ناخوازن لێ به‌لێ هه‌ردوو وه‌لات گه‌فا لێ ئێکدوو دکه‌ن ب لێدانێن توند گه‌ڕ هێرشه‌کا سه‌ربازی بهێته‌ کرن، ئه‌ڤ چه‌نده‌ ژی تشته‌کێ نوی نینه‌ به‌لکو به‌شه‌که‌ ژ سیاسه‌تا ئه‌مریکا ل دژی ئێرانێ بناڤێ سیاسه‌تا "زورترین گوشاڕان" بسه‌ر ئێرانێ. فوکوسا ڤێ سیاسه‌تێ لێدانا هه‌می جومگه‌یێن ده‌سهه‌لاتێ ل ئێرانێنه‌ هه‌ر ژ لایێ ئابووری، سیاسی و تاکو نوکه‌ گه‌هشتیه‌ ئاستێ سه‌ربازی. و مه‌به‌ستا ترامپی ژ په‌یروه‌کرنا ڤێ سیاسه‌تێ ڤه‌دگه‌رینیته‌ڤه‌ بو گوشارێن به‌ری نوکه‌‌ لسه‌ر رژێما ئێرانێ کو بێ باندوور بونه‌. د ڤان کاوودانێن دوماهیێ تشتێ هه‌ڕه‌ سه‌ره‌نجراکێش ژ لایێ شروڤه‌کارێن ئاسایێشا نیڤده‌ووله‌تیڤه‌ ڤه‌دگه‌ریته‌ڤه‌ بو بهه‌ڤره‌بوونا ترامپ و جون بوڵتن‌ کو ترامپ ب سه‌روکێ خودان بریارێن نه‌چاڤه‌رێکری دهێته‌ نیاسین و جون بوڵتن وه‌که‌ سه‌رسه‌خترین که‌سایه‌تیێ دژی رژێما ئێرانێ کو ئه‌ڤ چه‌نده‌ شانسێ بکارئینانا چه‌ک زێده‌تڕ لێدکه‌ت وشانسی بکارئینانا دیپلوماسیه‌تێ کێمتڕ. بناڤلێکرنا سوپایێ پاسداڕان و دناڤدا سوپایێ قودس ب سه‌رکێشیا قاسم سوله‌یمانی هه‌ر ب پلانێن جون بوڵتنێ راوێژکارێ ئه‌نجومه‌نێ ئاسایێشا ئه‌مریکا دهێته‌ ته‌ماشه‌کرن کو ئه‌ڤه‌ ئێکه‌م جاره‌ سوپایێ نیشتیمانیێ وه‌لاته‌کێ ب تێروریست بهێته‌ قه‌له‌مدان. هاتنه‌ سه‌ر کارا مایک پومپێیو وه‌که‌ وه‌زیرێ ده‌رڤه‌یێ ئه‌مریکا کو به‌ری نها سه‌روکێ سی ئای ئه‌ی بوویه‌ و دژه‌ ئێرانه‌ ته‌واوکرنا وێ سێگوشه‌یا بریاردانێیه‌ د پروسێسێن دیارکرنا سیاسه‌تا ده‌رڤه‌ و ئاسایێشا نیشتیمانیا ئه‌مریکا، چونکه‌ نوکه‌ کوچکا سپی کو دونالد ترامپ سه‌روکه‌ و سه‌روکێ گشتیێ هێزێن چه‌کدارێن ئه‌مریکایه‌، وه‌زاره‌تا ده‌رڤه‌ و راوێژکارێ ئه‌نجومه‌نێ ئاسایێشا ئه‌مریکا هه‌رسێ دژه‌ ئێرانینه‌ و پێنتاگون وه‌که‌ وه‌زاره‌تا به‌رگیریێ لایه‌نێ جێبه‌جیکاره‌ نه‌ک بریاردانێ، و هه‌ر ئه‌ڤه‌ بوویه‌ ئه‌گه‌ڕێ دروستبوونا ترسێ ژ لایێ کونگرێسا ئه‌مریکا کو ب هیچ شێوه‌یه‌کێ نابیت ئه‌مریکا بچیته‌ د شه‌ره‌کێدا دگه‌ل ئێرانێ بێ ڤه‌گه‌راندن ژ بو کونگرێسێ. چونکه‌ ده‌سهه‌لاتا داووی یا بریاردانا شه‌ر د ده‌ستێ کونگرێسێ دایه‌. ده‌سهه‌لاتا بولتونی وه‌که‌ راوێژکارێ ئه‌نجومه‌نێ ئاسایێشا نیشتیمانی لایه‌نێ جێبه‌جیکرنێ نینه‌ به‌لکو لایه‌نێ پلاندانانێیه‌ و ئه‌ڤ چه‌نده‌ دبیته‌ ئه‌گه‌ڕێ هندێ که‌ سیاسه‌تیا دژایه‌تیکرنا کوماڕا ئیسلامیا ئێرانێ ژ لایێ بولتونی ڤه‌ ببیته‌ ئه‌گه‌رێ هندێ کو ئه‌و پلانێن بولتون پێشکه‌شی ترامپی بکه‌ت وه‌که‌ دانانا وان داڤا بهێته‌ شروڤه‌کرن کو ده‌ستپێکرنا وان دێ کاره‌کێ ئاسان بیت لێ ده‌رچون ژوێ کاره‌کێ زه‌حمه‌ت و بێ باندوور نابیت. هه‌رچه‌نده‌ پروپاگه‌نده‌یێن وه‌که‌ لێدانا ئێراێ دهێنه‌ کرن لێ د واقعیه‌تا نوکه‌ و نه‌خشه‌یا سیاسیا ناوچه‌یی و جیوپولیتیکی دونالد ترامپ ژی خوازیاری شه‌ڕه‌کێ دگه‌ل ئێرانێ نینه‌. لێ دهه‌مانده‌مدا ئه‌گه‌ڕێ به‌رپابوونا شه‌ڕه‌کێ هه‌یه‌ کو ترامپ ده‌ستپێبکه‌ت ئه‌و ژی ئه‌گه‌ڕ ئه‌ڤ کاوودانه‌ و گرژیه‌ ببنه‌ ئه‌گه‌رێ نیشاندانا ملکه‌چبوونا ئه‌مریکا ژ بو واقعیه‌تا ده‌سهه‌لاتا ئێرانێ د ناوچێدا کو ترامپ وه‌که‌ سه‌روکێ ئه‌مریکا و دژه‌ ده‌سهه‌لاتا کوماڕا ئێرانێ قه‌بوول ناکه‌ت کو ئه‌ڤ وێنه‌یه‌ بو هێزا ئێرانێ د ناوچێدا بهێته‌ کێشان.
لایه‌نێ دیێ ڤان گڕژیان لایه‌نێ ئێرانیه‌، کو ئه‌ڤ کڕیارێن حکومه‌تا ئه‌مریکایێ د باشیا وان لایه‌نێن راستره‌وێن ئێرانیدا بشکێت کو دژبه‌ڕێن توندێنن رێکه‌فتننامه‌یا ئه‌تومی بویینه‌. ئه‌ڤه‌ بوویه‌ ئه‌گه‌ڕێ به‌رزبوونا ده‌نگێ دژبه‌ریێ ل دژی ده‌سهه‌لاتا روحانی، چونکه‌ ڤه‌کێشانا ئه‌مریکا د رێکه‌فتنامه‌یا ئه‌تومی وه‌که‌ خه‌یانه‌ته‌کێ ل دژی ئێرانێ و گه‌ڵێ ئێرانێ قه‌له‌م دده‌ن و گه‌هه‌شته‌ وی ئاستی کو رێبه‌ڕێ شوره‌شا ئیسلامی ل ئێرانێ بێژیت گوفتگویێن دگه‌ل ئه‌مریکا وه‌که‌ ڤه‌خارنا ژه‌هرێیه‌. هه‌بوونا قاسم سوله‌یمانی به‌رامبه‌ر بولتونی هاوکێشه‌یا گڕژیان ئالووزتر لێدکه‌ت چونکه‌ قاسم سو‌له‌یمانی فه‌رمانده‌یێ سوپایێ قودسه‌ کو ئه‌رکێ ڤی سوپایی ب جهئینانا ئه‌رک و پاراستنا به‌رژه‌وه‌ندیێن ئێرانێنه‌ ل ده‌رڤه‌یی سنورێن ڤی وه‌لاتی. قاسم سوله‌یمانی وه‌که‌ ده‌سته‌ راستێ خامنه‌یی دهێته‌ ته‌ماشه‌کرن د نه‌خشه‌ رێگه‌یێن سه‌ربازی و ئه‌منیێن ئێرانێ و که‌سێ ژماره‌ ئێکێ ئێرانێ دهێته‌ ته‌ماشه‌کرن ژ بو دارشتنا سیاسەتا دەرڤەیا ئێرانێ بو نمنونا ڤێ چه‌ندێ ڤه‌دگه‌ریته‌ڤه‌ بو هاتنا به‌شار ئه‌سه‌د بو لایێ خامنه‌یی کو سه‌رپه‌رشیارێ ڤی کاری قاسم سوله‌یمانی بوویه‌ کو هه‌تا جه‌واد زه‌ریف وه‌که‌ وه‌زیرێ ده‌رڤه‌یێ ئێرانێ ئاگه‌هداری ڤێ سه‌ره‌دانێ نه‌بوو و بو ئه‌گه‌رێ توره‌ییا توندا زه‌ریفی و پێشکه‌شکرنا نامه‌یا ده‌ستلکارکێشانێ کو پشتی هنگی نه‌هاته‌ قه‌بوولکرن.  باندوورێن ڤێ چه‌ندێ سه‌ر حکومه‌تا ئێرانێ گه‌هشتیه‌ ئاسته‌کێ مه‌ترسیدار و لایه‌نێن کو دژه‌ روژئاڤاینه‌ تاکو دهێت ده‌نگێ وان به‌رزتڕ و کاریگه‌ڕتر لێدهێت. گوشارێن ئابووری و سیاسیێن ئه‌مریکا لسه‌ر ئێرانێ هه‌می جومگه‌یێن گرێدایی ب ئابووری ڤه‌ گرتینه‌ و بوییه‌ ئه‌گه‌رێ لاوازیه‌کا زور د ئابووریا ئێرانێدا و جهێ گومانێ نینه‌ کو ئابووریه‌کا لاواز دێ باندوورێ لسه‌ر کاروبارێن سه‌ربازی و ئه‌منی ژی که‌ت و دهه‌مانده‌ما بیته‌ ئه‌گه‌رێ زێده‌بوونا هه‌لواسانێ د کومه‌لگه‌هێ دا کو بلندبوونا ده‌نگێ ناره‌زایه‌تیبوونێ دناڤا هاوولاتیان دێ وی ده‌می کارتا هه‌ڕه‌ مه‌زن و مه‌ترسیدار بیت لدژی حکومه‌یا نوکه‌ یا روحانی. تشتێ هه‌ڕه‌ گرنگ پێکهاته‌یا کومه‌لایه‌تیی و ئایینا ئێرانێه‌ کو ئه‌ڤ گوشاڕێن ئه‌مریکا لسه‌ر ئێرانێ دێ بیته‌ ئه‌گه‌ڕێ وێ چه‌ندێ کو زورینه‌یا هاوولاتی و که‌سایه‌تیێن خودان باندوور نێزیک ببن ژ لایه‌نێن راستره‌وو و دویر بن ژ لایه‌نێن ئاشتیخواز و هه‌ژێکه‌رێن په‌ڕه‌پێدانا په‌یوه‌ندیان دگه‌ل روژئاڤا. ئه‌مریکا وێ چه‌ندێ باش دزانیت کو لایه‌نێ ئایینی یێ وه‌لاتێ ئێرانێ گه‌له‌کێ بهێزه‌ و ئه‌ڤ خوپێشاندنانێن دژه‌ ده‌سهه‌لاتا کوماڕا ئیسلامیا ئێرانێ ل چه‌ند کوچه‌ و کوڵانان ل به‌رامبه‌ر هێزا لایه‌نێ ئایینیێ ئێرانه‌ تشته‌که‌ هه‌ر ناهێته‌ به‌راوردکرن. چونکه پتڕی رێژه‌یا سه‌دێ ۹۰ێ هێزێن سه‌ربازی، ئه‌منی و چه‌کدارێن د سنورێ وه‌لاتێ ئێرانێ لسه‌ر رێچکه‌یا شیعه‌گه‌ری هاتینه‌ په‌روه‌رده‌کرن و ئه‌ڤه‌ مانایا هندێ دده‌ت کو خامه‌نه‌یی وه‌که‌ رابه‌رێ شوره‌شا ئیسلامیا ئێرانێ هه‌ر بریاره‌کا بده‌ت دێ ئه‌ڤ هێزه‌ وه‌که‌ فه‌توایه‌کێ ته‌ماشه‌بکه‌ن و هه‌می هێز و به‌رژه‌وه‌ندیێن ئه‌مریکا ل ته‌ڤایا روژهه‌لاتا ناڤه‌راست که‌نه‌ ئارمانج. جێرمی هانت یێ وه‌زیرێ ده‌رڤه‌یێ به‌ریتانیا ئه‌ڤ ترسه‌ نه‌ڤه‌شارت کو نه‌بوونا تێکه‌لیێن دیپلوماسی دناڤبه‌ڕا ئه‌مریکا و ئێرانێ ئه‌گه‌رێ شه‌ڕ زێده‌تڕ لێدکه‌ت و بچوکترین لێکتێنه‌گه‌هشتن د ئاڤێن خه‌لیجی یان هه‌ر جهه‌کێ دیێ ناوچێ دشێت ببیته‌ ئه‌گه‌ڕێ سه‌رهه‌ڵدانا شه‌ره‌کێ یێ که‌سه‌ک دوماهیا وێ نه‌زانیت. لێ هه‌ژی ئاماژه‌ پێکرنێ یه‌ سه‌رهه‌لدانا شه‌ری دناڤبه‌را ئه‌مریکا و ئێرانێ دێ سه‌رهه‌لدانا شه‌ری بیت د ته‌ڤایا ناوچه‌یێن دکه‌ڤنه‌ هیڵالا شیعیدا، کو ژ ته‌هرانا پایته‌ختێ ئێرانێ ده‌ستپێدکه‌ت ژ بو عێراق، سوریا و پاشان بو لوبنان و ئه‌ڤ چه‌نده‌ تشته‌که‌ کو نه‌ ئه‌مریکایێ دڤێت نه‌ هیچ وه‌لاته‌کێ ناوچێ چونکه‌ روژهه‌لاتا ناڤه‌راست به‌رگه‌یی چ جوڕه‌ شه‌رێن وه‌ها مه‌زن ناگریت و دێ بیته‌ ئه‌گه‌رێ تێکدانا بالانسێ د ناوچه‌یێدا ، هه‌بوونا خامنه‌یی به‌رامبه‌ر ترامپی و قاسم سوله‌یمانی به‌رامبه‌ر بولتونی و پومپێیو بویه‌ ئه‌گه‌رێ دروستبوونا هاوکێشه‌یه‌کا ئالووز کو هه‌ردوولا ئاماده‌یێ هندێ نینن ژ بو مڵکه‌چبوونێ بو لایه‌نێ به‌رامبه‌ر.





ئەم هەواڵە 898جار خوێندراوەتەوە
 
 
ڤیدیۆ گەلەری
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
ڤیدیۆیی .... بە ئاگر و شمشێر قژی ئافرەتان رێکدەخات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad