English | عربی | Kurdî دواهەواڵ
ڕاستەوخۆ  
 
دوماهیک شیرەت
2019-07-17 [09:45 AM]

نڤیسینا : سوهەیب میکائیل


هەرچەند رۆژگار دەرباز ببیت ، گرنگی دان ب رۆلێ پەروەردێ و گەشەپێدانا جڤاکی زێدەتر دبیت . ئەڤەژی ب فاکتەرەکێ بهێز دهێتەدانان ژبۆ گەشەپێدانا ئابوری و جڤاکی و رەوشەنبیریێ ، ب تایبەت ل سەدێ بیست و ئێکێ ژلایێ پتریا وەلاتان گرنگیا خوە هەیە و بەردەوام کار بۆ پێشکەفتنا وێ دکەن . و دێ شێین بێژین بەهرا پتر ژوان وەلاتێن پێشکەفتی ئەون یێن لدەسپێکێ گرنگی دایە پەروەردێ و شیان مرۆڤەکێ خودان پەروەردە و رەوشت و زانست پێشکەشی جڤاکی بکەن . پەروەردەکێ ساغلەم دناڤ جڤاکیدا دشێت کەلتورێ رەوشەنبیریێ ژ نەوەیەکی بۆ نەوەکێ دن ڤەگوهێزیت ، ئەڤەژی ئەرکەکێ پێدڤیە دناڤ هەر جڤاکەکی دا و رێکەکە بۆ پێشکەفتن و نویخوازیا ژیانێ . د پەیوەندیا دناڤبەرا پەروەردێ جڤاکیدا دێ شێین بێژین پەروەردە نەشێت تنێ سەرەدەریێ دگەل تاکێن جڤاکی ب شێوەیەکێ داخراو بکەت ، چونکی تاک بەرهەمێ جڤاکییە و هەر جڤاکەک بنیاتا پەروەردێ ساغلەم و مکوم بیت ئەو جڤاک دێ رۆژ بۆ رۆژی بەرەڤ پێشڤە چیت .
ئەگەر ئەم ل جڤاکێ کوردی بنێڕین و پیچەک پاشڤە بزڤڕین، ل نیڤا ئیکێ ژ سەدێ بیستێ  جڤاکێ کوردێ دێ شێین بێژین ۹۰٪ نەخاندڤان بوون . ل پشتی سەرهەلدانێ و دامەزراندنا حکومەتەکا کوردی ب جدی کار لسەر نەهێلانا نەخویندەواریێ هاتەکرن ، ب تایبەت ژ هەردوو رەگەزێن نێر و مێ سەرەڕای هەبونا ئەو کێم کاسێن د کەرتێ پەروەردێ دا لێ حکومەتا هەرێمێ ب تایبەت سەرۆکێ بەرێ یێ حکومەتێ جەنابێ نێچیرڤان بارزانی لدەمێن بوری د هەولێن بەردەوامدا بویە بۆ چارەسەرکرنا گرفتێن پەروەردێ ، پێخەمەت دروست بونا پێشکەفتنێ د وی کەرتیدا . د نهادا ئەو هاوکێشەیا نەخاندەڤانیێ بەروڤاژی لێ هاتیە دێ شێین بێژین پتر ژ ۹٥٪ خەلکێ کوردستانێ خاندەڤانن ئەڤەژی ب دەسکەفتەکێ مەزن بۆ حکومەتا هەرێمێ ل دەمێن بوری دهێتە هژماردن . د نهادا ل هەرێما کوردستانێ هژمارەکا زۆر ژ قوتابخانە و زانینگەهێن حکومی و ئەهلی هەنە و جڤاکێ کوردیژی ململانیێا شارستانیەتێ دکەت . 
د پرۆسەیا پەروەردێدا پاداشتکرنێ رۆلەکێ بەرچاڤ هەیە بۆ هاندانا قوتابیێن سەرکەفتی . ئەڤ سالەژی وەک هەر سالێن دن نێچیرڤان بارزانی سەرۆکێ هەرێما کردستانێ ئێکەمێن سەر ئاستێ هەرێمێ ل پرۆسەیا پەروەردە و فێرکرنێ د رێورەسمەکێدا خەلاتکر . سەرۆکێ هەرێمێ ل هەمبەری وان قوتابیاندا گوتارەک پێشکەش کر و گۆت : " کوردستان ل بەندا قوتابیێن زیرەک و خودان شیانە ، پێخەمەت هندێ کو لسەرجەم بواراندا پێشبکەڤیت و خەونا هەمی پێهکاتێن کوردستانێ ب گەنجێن وەکی هەوە دهێتە ب جهـ ئینان " هەروەسا ئاماژە دا هندێ کو ئازادی و سەرفرازیا گەلان د زانستێدایە و سەرکەفتنا هەوەژی د خواندنێ دایە ، و دوماهیک ئامۆژگاریا من بۆهەوە ( خواندن ، خواندن ، خواندنە ) هوون لهەر جهەکی بن ، سەرکەفتنا هەوە سەرکەفتنا مەیە " ئەگەر ئەم لڤان گۆتنان بنێڕین و خواندنەکێ بۆ بکەین ، بۆمە دیاردبیت نێچیرڤان بارزانی چ لدەمێ بوری وەک سەرۆکێ حکومەتێ چ نها وەک سەرۆکێ هەرێمێ پالپشتەکێ مەزنە بۆ پرۆسەیا پەردەوە و فێرکرنێ . ب دیتنا مە د جڤاکێ مەدا هێشتا پەروەردێ گەلەک ئارمانجێن مەزن ل پێشن پێدڤیە لدەمێن داهاتی کار لسەر بکەت . ژ هەمیا گرنگتر پێدڤیە پەروەردە تاکەکێ خودان هەستەکێ نەتەوەیی پێشکەشی جڤاکی بکەت ، کو بشێت راست و چەپێ خوە ژهەڤ جودا بکەت . بشێت دۆست و دوژمنێ خوە ژهەڤ جودا بکەت و خیانەتا خاک فرۆتنێ لجەم وان ئاسایی نەبیت .





ئەم هەواڵە 1129جار خوێندراوەتەوە
 
 
ڤیدیۆ گەلەری
چەند بیرۆکەیەک بۆ ڕزگاربوون لە گەرمای ھاوین
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad