English | عربی | Kurdî دواهەواڵ
ڕاستەوخۆ  
 
مه‌سرور بارزانی پیاوه‌ ئاوریشمیه‌ پۆڵاینه‌كه‌، به‌رنامه‌ی كارای حكومه‌ته‌كه‌ی راگه‌یاند
2019-07-23 [12:26 PM]

نووسینی: د.محه‌مه‌د خدر مه‌ولوود


لە دوای ٣٠ ی ئەیلولی ٢٠١٨ و پاش چاوەڕوانییەکی زۆر و پتر لەو چاوەڕوانییانەی بۆھەر ھەشت کابینەکانی پێشوو ھەمان بوو، رۆژی ١٠ ی ئەم مانگە مەسرور بارزانی بەرنامەی کاری – کارای کابینە تازەکەی حکومەتە بەھێزەکەی راگەیاند و رۆژی ١٥ی ئەم مانگەش یەکەمین کۆبوونەوەی ئەنجامدا.

گوتمان مەسرور بارزانی، کارنامە و بەرنامەی کابینە بەھێزەکەی راگەیاند. حکومەتی بەھێز، بەرھەمی لەدایک بوونی بەرنامە و دروشم و بانگەشەی ھەڵبژاردنی پارتی دیموکراتی کوردستان بوو کە لە ٣٠ی ئەیلولی ساڵی پاردا بە زۆرینەی دەنگ براوەی یەکەمی ھەڵبژاردنی بۆ( کوردستانێکی بەھێز و بەھێزتر ) مسۆگەر کرد و لە سەر ئاستی عێراق و ناوچەکە و دونیاش سەلماندییەوە بێ پارتێکی بەھێزی وەک پارتی دیموکراتی کوردستان، کوردستانێکی بێ ھێز و کۆمەڵگایەکی لاواز دێتە بەرھەم و ھاوکێشەکانیش نەک ھەر لاسەنگ دەبن، بەڵکو ئیرادە و ویستی نەتەوەییش زیاتر دەکەونە ژێر مەترسی و ھەڕەشە و فشار و ھەژموونە ھەمیشەییەکانی لەناوچوونی قەوارە و کیانەکە.

ئەوەیان واقیعی حاڵی ئەو باردۆخەی کوردستان بوو، بە لەبەر چاوگرتن و بەرزنرخاندنی  رۆڵ و پێگەی پارت و لایەنە نیشتیمانییە کوردستانییەکانیش، لە دوای پرۆسەی ریفراندۆمی سەربەخۆیی، کوردستان لە نێو بارودۆخێکی چەقبەستووی نێو ھەژموون و فشارەکاندا قەتیس مابوو. 

لەو ئان و ساتەی ھەڵبژاردنەدا و لە نێو دڵەڕاوکێ و مەترسییەکاندا کە کابینەی نۆیەم  لەدایک بوو، وەک بەرھەمی خەباتی پەرلەمانی و حکومەتداری قۆناغی دیموکراتی و مەدەنی دوای راپەڕینی ئازاری ١٩٩١ و درێژەپێدەرێکی ئەو رێبازەیە تا بە خوێنی تازە و کارەکتەری دیکەی کارا، حکومەتمەداری کاراتر و بەھێزتر و سەنگینتربێ.

گەرھەندێ لە جومگەکانی ئەو کابینە تازەیە لەسەر سەبەتەیەکی زێڕینی رۆژە سەختەکانی کابینەی ھەشتەمەوەش خۆی بینا بکاتەوە، زۆر ئاساییە، چونکە مەسرور بارزانی  سەرۆک وەزیرانی نوێ بەر لە ھەر کەسێکی دی و باشتر لە کەسانی دیکەش ھەست بە قۆناغەکانی بەر لە حکومەتەکەی خۆی دەکات. زۆرباش ئاگادارە و زۆر باشیش ئەو راستییانەی لە بەر چاوە، کە حکومەتی نێچیرڤان ‌بارزانی لە ماوەی ئەو چوار ساڵەی دوایدا چەندین گرفت و کێشە و ئاستەنگی مەزنی لە بەردەمدا ھەبووە. گرنگترینی ئەو گرفتانەش بە سەرەقەلەمێکیش بێ ئەوانەی خوارەوەن :

یەکەم: بڕینی بودجە و مووچە لە سەردەمی مالیکی – عەبادی وەک ئاگادارین چۆن بوو و چۆن پیادەکرا.

دووەم: ھێرش و پەلامار و شەڕی تیرۆرستانی داعش و داگیرکاری و جینۆسایدکردن و ئاوارەبوونی ھەزاران بە ھەزاری ناوخۆ و دەرەوەو رووکردنە ھەولێر و دھۆک و سلێمانی لە ملیۆنانی ئاوارە و لێقەوماوان باری گران و دەردی گران بوون، لە سۆنگەی داعشەوە ئەو کۆمەڵە پەتا و بەڵایانە بوون یەخەی کوردستان و مرۆڤایەتییان گرت.

سێییەم: پرسی مەزنی ریفراندۆمی سەربەخۆیی کوردستان و دواتر  لێکەوتە و دەرھاویشتەکانی ١٦ی ئۆکتۆبەر و داگیرکردنی کەرکووک و ھێڕش و پەلامارەکانی پردێ وسحێلا، رووداو و پرسێکی وا ئاسان نەبوون وەک ھەندێ کەس و لایەن لە گۆشەیەکی تەسکەوە سەیری دەکەن و دەیبینن.

لەو نێوەند و گێژاوەی ئەو ماوەیەی کە کوردستانی تێکەوتبوو، گەر ژیری و حیکمەت و ئایندەبینی دیبلۆماسییانەی سەرۆک و رابەری بە ئەزموون  مەسعود بارزانی نەبوایە و جێبەجێی کارە دبلۆماسیە میانڕەوەییەکەی نیچیرڤان بارزانی پیادەی نەکردبایە، قۆناغی ھەستانەوەو کرانەوە بە رووی جیھانی دەرەوە لە دوای ریفراندۆم درەنگتر دەکەوتنەوە سەر واری واقیع و سەر راستەڕێی دەسەڵات و حوکمداری کوردستانێکی یەکگرتوو.

لە راستی دا ئەو چەمکە نادیارانەی پشت پەردەی کاری سیاسیی و کارگێڕی دەوڵەتی ( ڕۆڵ، پێگە، پایە، کارەکتەر، کەسایەتی ) کاریزمایین، بە درێژایی مێژووی خەبات، ‌پەروەردەی ئەو بنەماڵە و خانەوادە و قوتابخانەیەی بارزانە و، وەک بینیمان  کەسایەتییەکان، کارەکتەرەکان ئەوانن پیاوی خاوەن پرەنسیپی ساتەکانی تەنگانە و قەیرانەکان. ئەو کاریزماییەش لە حیکمەت و ژیری ئەو رێباز و رێچکەیەوە سەریھەڵداوە کە رێباز و پەیڕەوی - لە سەرکەوتن مەغروور نەبوون، لە شکست نائومێد نەبوون- ەی باوکە، بۆتە بۆماوە و کەلتووری خەبات و تێکۆشانی پتر لە ١٠٠ ساڵەی خەبات و تێکۆشان، ھەر لە سەردەمی شێخ عەبدولسەلام بارزانی پێشەنگی بزاڤی ناسیونالیستی شۆرشگێرییەوە تا ساتی ئەمڕۆ بوونەتە رێچکە و رێباز.

وەک بینیمان، لە دوای کارەساتی داگیرکردنی کەرکووک، گەر ئەو کاریزمایەی کارەکتەر و رۆڵ و پێگەی سەرۆک بارزانی نەبوایە، نەک ھەر کەرکووک، ھەولێر و دھۆک و سلێمانیشمان  لە دەست دەچوو.

مەسرور بارزانی سەرۆکی کابینەی تازەی حکومەتی ھەرێمی کوردستان، سەرۆکی چاوەروانکراو و جێ ئومێدی جەماوەرە. 

ئەو، کوڕی باوکی خۆیەتی، باوک پێشمەرگە و سەرۆک و رابەری نەتەوەیەکە، ناوونیشان و سومبولی پرسێکە دوور لە سازش و بگرە و بەردە و گەنگەشەی  سەفسەتانە.

ئەو، گەنجی لێوەشاوەی ژوورە رووناکەکانی دەزگای ئاسایش و پاراستنی نەتەوەیی و نیشتیمانی نییە، خاوەن ئەزموونە، لە ھەولێرەوە سەرکردایەتی کابینەی تازەی حکومەتی کوردستان دەکات و بەرنامە و نەخشەڕێگای حکومەتە تازەکەی بە خاکەڕایی و بێ بریق وباق پێشکەش دەکا و، ناونیشانێکی سادەی وەک ( ھێلە گشتییەکانی بەرنامەی کاری حکومەتی کوردستان)ی پێدەبەخشێ. 

چاودێران و شرۆڤەکاران کە ناوەرۆکی بەرنامەکە دەخوێننەوە دەگەنە ئەو راستییەی کەوا بەرنامەی کارەکە، نە ھێلی گشتی بوون، نە سەرەقەڵەم، بەڵکو نەخشەڕێگا بوون، نەخشەڕێگای بەرنامەی کارای حکومەتی کوردستانی دوای شەڕ و گرفت و قەیرانە   کەڵەکەبووەکان. ئەو نەخشەرێگایەش خۆی لە ھەمیشە ‌چاکسازی و بەدواداچوون و گەشانەوەو بوژانەوەو ئاوەدانکردنەوەی زیاتری ژێرخانی ئابوری و توانای سامانی مرۆیی زیاتر دەبینێتەوەو ئامانجیش ھەر ھێنانەدی ئەو دروشمەیە حکومەتێکی بەھێز بۆ کوردستانێکی بەھێزی دوور لە قۆرغکاری و گەندەڵی.

مەسرور بارزانی سەرۆکی کابینەی نۆیەمی حکومەتی کوردستان، لەسەر بنچ و بنەوانی باوانی درێژە بە خەبات و تێکۆشانی شارستانیی و مرۆیی نەوەی تازەی مەدەنی دەوڵەتمەداری دەدات و لە نێو ئەو ھەموو ھەڵچوون و داچوونەی باردوخی ناوچەکەدا، کابینەی پێش خۆی چەندە جوان و چەندە بەھێز بوو، کابینەی نۆیەم جوانتر و بەھێزتر دەکات و ئەزمونی حکومەتمەداری کوردستانی بە پشتیوانی سەرۆکی ھەرێمی کوردستان نێچیرڤان بارزانی و رێنمایی و پشتگیری رابەر و سەرۆک بارزانی باشتر و پتەوتر دەچەسپێنێ .

ئەو پشتیوان و پشتگیرییە لە ھەردوو ئاستی بەرزدا، چۆن مایەی خۆشحاڵی جەماوەرو خەڵکی کوردستانە، ئاواش ھێز و توانا و سەنگێکی دیکەیە. بۆیە ھەرگیز سازش لەسەر پرەنسیپ و پرسە مەزنەکان ناکرێت. 

ئەو، مەسرور بارزانی  پیاوە ئاوریشمە پۆڵاینەکەیە، نەک پیاوی مەحاکم تەفتیش، بۆیە زۆر پێویستە وێنەکە وەکو خۆی بە جوانی و درەوشاوەیی لە چوارچیوە رەنگینە قەشەنگەکەیدا ببینرێت.  ‌
 





ئەم هەواڵە 475جار خوێندراوەتەوە
 
 
ڤیدیۆ گەلەری
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
بە ڤیدیۆ.. كاره‌ سه‌خت و نایابه‌كانى چه‌ند كرێكارێك
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad