حەسەن رۆحانی و ئیمانۆئل ماکرۆن
	2019-07-23 [01:09 AM]

حەسەن رۆحانی سەرۆككۆماری ئێران پەیامێك بۆ ئیمانۆئێل ماكرۆن سەرۆكی فەرەنسا دەنێرێت و عەباس عێراقچی جێگری وەزیری دەرەوەی ئێران، بۆ گەیاندنی پەیامەكەی رۆحانی بەرەو فەرەنسا بەرێكەوت.

عەباس مووسەوی گوتەبێژی وەزارەتی دەرەوەی ئێران لەوبارەوە رایگەیاند، عێراقچی نامەیەكی نوسراوی حەسەن رۆحانی دەگەیەنێتە ماكرۆن و بۆ ئەو مەبەستەش شەوی رابردوو بەرەو پاریس بەرێكەوتووە، لەبارەی ناوەرۆكی پەیامەكەش ھیچ زانیارییەكی بڵاونەكراوەتەوە.

لە یەك مانگی رابردوودا سەرۆكۆماری ئێران و فەرەنسا تایبەت بە كەمكردنەوەی ئاڵۆزییەكانی ناوچەكە و پرسی رێككەوتنی ئەتۆمی، دوو جار بە تەلەفۆن قسەیان كردووە. پێشتریش ماكرۆن رایگەیاندبوو، بۆ ھێوركردنەوەی رەوشەكە ئامادەیە لەگەڵ ترامپ، رۆحانی و پوتین كۆببێتەوە.