English | عربی | Kurdî دواهەواڵ
ڕاستەوخۆ  
 
بەنوێنەرایەتى سەرۆکى حکومەت، وەزیرى خوێندنى باڵا کۆنگرە و پێشانگەى ڕۆژهەڵاتى ناوەڕاستى کردەوە
2019-09-05 [11:03 AM]

ZNA - هه‌ولێر


 

ڕایگەیاند: پێویستە هەموو جێگایەکی وڵاتەکەمان بکەینە ژینگەیەک بۆ خوێندن و فێربوون و داهێنان، بۆ بەدیهێنانی ئەم ئامانجانەش پێویستمان بە هاوکاری و هەماهەنگی زیاتری نێوان وەزارەتی پەروەردەو خوێندنی باڵای حکومەتی عیراقی و هەرێمی کوردستانە.

ئەمڕۆ پێنجشەممە ئارام محەمەد قادر وەزیرى خوێندنى باڵا و توێژینەوەى زانستى وەک نوێنەرى مەسرور بارزانى سەرۆکى حکومەتى هەرێمى کوردستان، کۆنگرەو پێشانگای ڕۆژهەڵاتی ناوەڕاست بۆ خوێندن و تەکنۆلۆجیاو خوێندکاران و قوتابیان كرده‌وه‌ کە ژمارەیەک لەوەزیرانى حکومەتى عێراق و هەرێمى کوردستان و کونسوڵ و نوێنەرى وڵاتان ئامادەیبوون.

لەمیانەى پێشکەشکردنى وتەیەکیشدا ئارام محمد قادر بەناوی سەرۆکی حکومەتی هەرێمی کوردستان ڕایگەیاند، ئەم بۆنەیە دەرفەتێکی گونجاو بێت بۆ دروستکردنی دیبەیتێکی نیشتیمانی دەربارەی گرفتەکانی سیستمی پەروەردە و خوێندنی باڵا لەسەر ئاستی عیراق و هەرێمی کوردستان، ڕوونیشى کردەوە: پەروەردە و خوێندنی باڵا بنەمای سەرەکی گەشەپێدانی هەمە لایەنەی هەر وڵاتێکە، بۆ ئەوەش وتى: هەموومان دەبێت پێکەوە کار بکەین بۆ داڕشتنەوەی نەخشەڕێگای ڕیفۆرم و چاکسازی ئەم کەرتە گرنگە، و سیستمی خوێندمان، فەلسەفە و ناوەرۆکی پرۆگرام و سیستمی پێداگۆجیمان پێویستی بە دووبارە هەڵسەنگاندن و پێداچوونەوە و ڕیفۆرم هەیە.

هەر لە وتەکەیدا د.ئارام محمد قادر وتیشى: پرۆسەی خوێندن لەژێر کاریگەری گەشەکردنی تەکنۆلۆجیا و گۆڕانکارییە ئابوورییەکانی سەدەی بیست و یەک و دەرفەت و پێداویستییەکانی بازاڕی کار هەمیشە لە گۆڕانکاریدایە، لەم ڕوانگەیەوەش وەزیرى خوێندنى باڵا رایگەیاند: ئێمەش پێویستمانە بە دیدو دونیابینییەکی کراوە خۆمان بۆ گۆڕانکاری چاکسازی ئامادە بکەین.

لەبارەى داڕشتنەوەى سیستمى پەروەردەو خوێندن لە زانکۆکان، د.ئارام محمد وتى: گرنگە سیستمی پەروەردەیی و خوێندنی زانکۆکانمان بە جۆرێک دابڕێژینەوە کە قوتابی و خوێندکار بکەینە سێنتەری پرۆسەی فێربوون و بواری بیرکردنەوە و داهێنان و کارسازی و بنیادنانی کارامەیی تێڕوانینی ڕەخنەیی زیاتر بۆ ڕۆڵەکانمان برەخسێنینن، وتیشى: پێویستە گرنگی زیاتر بە خوێندنی تەکنیکی و ڤۆکەیشناڵ بدەین و ناوەرۆکی پرۆگرامەکانی خوێندنمان زیاتر ببەستینەوە بە پێداویستییەکانی بازاڕی کار و سێکتەرەکانی کۆمەڵگا و بزنس و پیشەسازیی.

لەو چوارچێوەیەشدا وەزیرى خوێندنى بالا وتى: ئێمە وەک حکومەتی هەرێمی کوردستان هەموو زەمینە سازییەک بۆ هاوکاری و هەماهەنگی و کاری پێکەوەیی دەڕەخسێنین، هیوادارم خوشک و برایانمان لە حکومەتی عیراقی فیدراڵ لەم پرۆسەیەدا هاوکار و پشتیوان بن، وتیشى: زۆر گرنگە هەمیشە ئەو ڕاستییەمان لەپێش چاوبێت کە دوای ئەو نەهامەتیانەی لە مێژوودا بەسەر گەلانی عیراقدا هاتووە، بزانین کە شاڕێی بنیادنانی خۆشگوزەرانی و ئارامی و سەقامگیری سیاسی و کۆمەڵایەتی بریتییە لە داڕشتنەوەی سیستمێکی پەروەردەیی مۆدێرن و پێشکەوتوو.

کۆنگرەو پێشانگەی ڕۆژهەڵاتی ناوەڕاست بۆ خوێندن و تەکنۆلۆجیا و خوێندکاران و قوتابیان بۆ ماوەى چوار ڕۆژ لە هۆڵى پێشانگه‌ى نێودەوڵەتى هەولێر بەردەوام دەبێت و کەتیایدا چەندین پانێڵ و دیبەیت و گفتوگۆى کراوەى زانستى لەلایەن پسپۆران و ئەکادیمیستان پێشکەشدەکرێت.

 





ئەم هەواڵە 1444جار خوێندراوەتەوە
 
 
ڤیدیۆ گەلەری
چەند بیرۆکەیەک بۆ ڕزگاربوون لە گەرمای ھاوین
بەدڵنایی دوو جار سەیری دەکەیەوە ، منداڵێکی زۆر قشە
چەند دیمەنێکی لافاوی شاری شیراز لە ئێران
لە رووداوێکی ھاتووچۆ ئۆتۆمبێلێک دەفڕێت
منداڵێک لە ناو ئۆتۆمبێلی دایکی دەکەوێتە خوارەوە
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad