English | عربی | Kurdî دواهەواڵ
ڕاستەوخۆ  
 
ئه‌و 20 ملیار دیناره‌ی بۆ پایته‌ختی رۆشنبیری دابینكرابوو گه‌نده‌لی تێدا كراوه‌
2019-10-29 [07:25 AM]

ZNA- هه‌ولێر


لیژنەی رۆشنبیری لە پەرلەمانی كوردستان راپۆرتێكی لەبارەی چۆنیەتی خەرجكردنی 20 ملیار دینارەكەی بودجەی پایتەختی رۆشنبیری ئامادە كردووە و داویەتی بە سەرۆكایەتی پەرلەمان، دوو ئەندامی لیژنەكەش وردەكاری ناوەڕۆكی راپۆرتەكە دەڵێن گەندەڵی و بەهەدەردان لە خەرجكردنی ئەو پارەیەدا هەبووە.

 

ساڵی 2013 ئەنجوومەنی وەزیران 20 ملیار دیناری بۆ ژێرخانی پایتەختی رۆشنبیری تەرخان كرد، لەسەر چۆنیەتی خەرجكردنەكەی قسە و باسی زۆر كران، بۆیە پەرلەمانی كوردستان لە 15/9/2019 لیژنەیەكی بەدواداچوونی پێكهێنا، لێژنەكە راپۆرتێكیان بۆ دەستەی سەرۆكایەتی پەرلەمان ئامادە كردووە.

 

گۆران عومەر، ئەندامی لیژنەی رۆشنبیری لە پەرلەمانی كوردستان رایگەیاند: "بەمەبەستی بەدواداچوونی چۆنیەتی خەرجكردنی ئەو 20 ملیارەی بۆ ژێرخانی كولتووریی پایتەختی رۆشنبیری تەرخان كرابوو، پێشتر لە 10/7/2019 چووینە لای خالید دۆسكی، وەزیری پێشووی رۆشنبیری، لە 15/9/2019 و 6/10/2019 لەگەڵ بابەكر دڕەیی، بەڕێوەبەری گشتی رۆشنبیری و هونەری سلێمانی دانیشتووین، دەركەوت تەنیا 8 ملیار دینار لەو پارەیە بۆ سێ پڕۆژەی ژێرخانی رۆشنبیری خەرجكراوە، ئەوانیش شانۆی رۆمانی، نۆژەنكردنەوەی قوتابخانەیەك و دروستكردنی هۆڵێك بوون".

 

بە گوتەی ئەو پەرلەمانتارە، پارەیەكی زۆر بە "هەدەر" دراوە و دەڵێت: "پارەكە لەلایەن بەڕێوەبەری گشتی رۆشنبیری و هونەری سلێمانییەوە وەكو مینحە تەماشاكراوە و بە میزاجی خۆیان خەرجیی خۆیان و هونەرمەندانیان لێ كردووە، لەكاتێكدا ساڵانە پارە بۆ كار و چالاكی رۆشنبیری خەرج دەكرێ، ئەمەش پێشێلكارییەكی یاسایی و ژمێریاری و كارگێڕییە و بەهەدەردانێكی ئاشكرایە".

 

بەپێی بەدواداچوونی لیژنەكە و بەگوتەی گۆران عومەر: "پارە بۆ چەند كۆمپانیا و شوێنێكی بازرگانیش خەرجكراوە. كۆمپانیای كەرتی تایبەت هەیە ملیارێك و 179 ملیۆن دیناری بۆ خەرج كراوە. كتێبخانەی ئەندێشە 15 ملیۆن دیناری بۆ خەرجكراوە لەكاتێكدا ئەوانە بزنس دەكەن و هیچ پەیوەندییەكیان بە ژێرخانی رۆشنبیرییەوە نییە".

 

لەو پارەیە دوو ملیار دینار بۆ بەڕێوەبەرایەتی وەرزش و لاوانی سلێمانی خەرجكراوە كە بەپێی قسەی پەرلەمانتارەكەی گۆڕان: "ئەویش بەشێوەیەكی دادپەروەرانە خەرج نەكراوە، یانەی وەرزشیی سلێمانی 65 ملیۆن دیناری پێدراوە و یانەش هەیە تەنیا 10 ملیۆن دیناری بۆ خەرجكراوە".

گۆران عومەر ئاشكرای كرد "111 ملیۆن دینار بەناوی بڵاوكردنەوەی كتێب دراوە بە كەسێكی نادیار لەكاتێكدا ئەو كەسە هیچ پەیوەندییەكی بە رۆشبیری و هونەرەوە نییە. نازانین مەبەست لە بڵاوكردنەوەی كتێب چییە؟ پارەیەكی زۆریش بۆ ئینستتیوتەكەی مەزهەری خالقی و 61 ملیۆن دینار بۆ كڕینی كەلوپەل بۆ یەكێتی نووسەران خەرجكراوە كە  هیچ پەیوەندییەكیان بە ژێرخانی رۆشنبیرییەوە نییە".

 

ئەو پەرلەمانتارە پێیوایە هەندێك شوێن هەن دەبوو بودجەیەكی باشیان بەو پارەیە بۆ خەرج كرابایە: 

 

چەند هونەرمەندێك بەناوی پڕۆژەوە پارەیان لەو بودجەیە وەرگرتووە، بەڵام پاكتاوی پڕۆژەكەیان نەهێناوەتەوە. گۆران عومەر دەڵێ: "باڵەخانە و ستۆدیۆ و هۆڵ هەن لە ساڵێكدا دوو جار نۆژەنكراونەتەوە كە ئەمە نایاساییە، چوار ملیار دیناریش بۆ كارگەی جگەرە تەرخانكراوە، بەڵام تەنیا 791 ملیۆن دیناری بۆ خەرجكراوە".

 

هەر بەپێی بەدواداچوونی لیژنەكەی پەرلەمان، پارەیەكی زۆر بۆ بەرهەمی هونەری خەرجكراوە، بەڵام بەرهەمەكان دیار نین. 

 

پێشەوا هەورامانی، ئەندامی لیژنەی رۆشنبیری لە پەرلەمانی كوردستان  رایگەیاند: "250 ملیۆن دینار بۆ فیلمێك تەرخان كراوە، بەڵام فیلمەكە هەر وجودی نییە. پارە بەناوی خەڵك و شوێنەوە خەرجكراوە و كەسەكە و شوێنەكە ئاگایان لێی نییە. كۆمپانیای بازرگانی هەیە زیاتر لە ملیارێك دیناری پێدراوە. كلیپ و شانۆگەری و یانەی وەرزشی هیچ پەیوەندییەكیان بە ژێرخانی رۆشنبیرییەوە نییە، بەڵام پارەیان بۆ خەرجكراوە".

 

پێشەوا هەورامانی ئاماژەی بۆ ئەوە كرد كە جگە لەوەی پارەكە لە شتی پێویست خەرج نەكراوە، لە خەرجكردنی پارەكەش جیاوازی كراوە "كلیپ هەبووە 500 هەزار دینار و كلیپیش هەبووە 27 ملیۆن دیناری بۆ خەرجكراوە، شانۆگەری هەبووە 400 هەزار دینار و شانۆگەریش هەیە 30 ملیۆن دیناری بۆ خەرجكراوە بەبێ ئەوەی ناوی بنووسرێت".

 

لیژنەكەی پەرلەمان دوای تەواوكردنی راپۆرتەكەیان، رۆژی 24/10/2019 لەگەڵ وەزیری رۆشنبیری كۆبوونەوە. گۆران عومەر دەڵێ: "وەزیری رۆشنبیری چەند تێبینییەكی هەبوو لەسەر چۆنیەتی خەرجكردنی 20 ملیار دینارەكە، ئەوانیشمان خستە نێو راپۆرتەكە و رادەستی دەستەی سەرۆكایەتی پەرلەمان و دەستەی دەستپاكی و دیوانی چاودێریی دارایی دەكەین".

 

 





ئەم هەواڵە 2677جار خوێندراوەتەوە
 
 
ڤیدیۆ گەلەری
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
بە ڤیدیۆ.. كاره‌ سه‌خت و نایابه‌كانى چه‌ند كرێكارێك
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad