English | عربی | Kurdî دواهەواڵ
ڕاستەوخۆ  
 
لە کۆڕبەندی داڤۆس 677 سەرکردە و بەرپرسی باڵای جیهان بەشداردەبن
2020-01-20 [12:38 PM]

ZNA- هه‌ولێر


بڕیارە رۆژی سێشەممە 21-01-2020، کۆڕبەندی ساڵانەی ئابووریی داڤۆس لە شارۆچکەی داڤۆس لە رۆژهەڵاتی سویسرا دەستپێبکات، لە کۆڕبەندەکە دەیان سەرکردە، گەورە بازرگان و چالاکوان بەشداریدەکەن، لەنێویاندا دۆناڵد ترەمپ، سەرۆکی ئەمریکا.

 

هاوکات نێچیرڤان بارزانی، سەرۆکی هەرێمی کوردستانیش بەشداری لە کۆڕبەندەکە دەکات و چەندین دیدار و کۆبوونەوە ئەنجامدەدات، لەنێویاندا لەگەڵ هەریەکە لە دۆناڵد ترەمپ، سەرۆکی ئەمریکا و مایک پێنس، جێگری سەرۆکی ئەمریکا.

 

سەرۆکی هەرێمی کوردستان بەشداری لە پانێڵێک دەکات لەژێر ناونیشانی "ناجێگریی لە رۆژهەڵاتی ناوەڕاست"، سەرنجی پانێڵەکە لەسەر عێراق و گرژییەکانی ئەم دواییەی ناوچەکەیە، هاوکات باس لە قەیرانەکان و پرسی سەقامگیری و ئاشتی ئێستای عێراق دەکرێت.

 

ئەمە یەکەمجار نییە کە بەرپرسانی باڵای هەرێمی کوردستان بەشداری لە کۆڕبەندی ئابووریی داڤۆس دەکەن. ساڵی 2017 سەرۆک مەسعود بارزانی بەشداریی لە کۆڕبەندی داڤۆس کرد و لە پانێڵێک بەشداربوو؛ ساڵی 2018 نێچیرڤان بارزانی وەکو سەرۆکوەزیرانی هەرێمی کوردستان بەشداریی لە کۆڕبەندی داڤۆس کرد و ئەمساڵ وەکو سەرۆکی هەرێمی کوردستان بەشداری لە کۆڕبەندەکە دەکات.

 

کلاوس شواب، سەرۆکی کۆڕبەندەکە دەڵێت "دۆناڵد ترەمپ، سەرۆکی ئەمریکا و گرێتا تانبێرگ، کچە چالاکڤانی بواری ژینگە بەشداریی کۆڕبەندی داڤۆس دەکەن". شواب کە هاوکات دامەزرێنەری کۆڕبەندی ئابووریی داڤۆسە رایگەیاند، لە کۆبوونەوەکانی ئەمساڵ تیشکیش دەخرێتەسەر پرسەکانی پەیوەست بە ژینگە.

 

لە کۆڕبەندی داڤۆسی 2020دا 677 سەرکردە و بەرپرسی باڵای جیهان بەشداردەبن، 175 پانێڵ و گفتوگۆی تایبەت لەسەر حەوت بواری سەرەکی بەڕێوەدەچن.

 

ئەمساڵ 50 ساڵ بەسەر بەڕێوەچوونی کۆڕبەندی ئابووریی جیهان لە داڤۆس تێدەپەڕێت. چاوەڕوان دەکرێ نزیکەی سێ هەزار کەس لە 118 وڵاتەوە بۆ بەشداریکردن لە کۆڕبەندی ئابووریی جیهان بگەنە شاری داڤۆس. 

 

لە ماوەی 50 ساڵی دامەزراندنیدا کۆڕبەندی ئابووریی جیهان گۆڕانکاریی زۆری بەسەردا هاتووە؛ کۆڕبەندەکە لەو ماوەیەدا لە کۆبوونەوەی نێوان بەڕێوەبەری کۆمپانیا گەورەکانی جیهان گۆڕدراوە بۆ گەورەترین کۆبوونەوەی کەسایەتییە سیاسی و کاریگەرەکانی جیهان.

 

دامەزرێنەری کۆڕبەندی ئابووریی جیهان لەوبارەیەوە دەڵێ "هەستێکی نامۆیە، دەبینیت ئەو هەموو کەسایەتییە بەشدارە و بەردەوام هەوڵدەدەیت لەپێش ئەو شتانە بیت کە روودەدەن. لەم رووەوە پێموایە ئەو 50 ساڵە زۆر بە خێرایی تێپەڕیوە؛ کاتێکیش سەیری دواوە دەکەم هەست بەوە دەکەم کە لە ماوەی 50 ساڵدا چەندە جیهان گۆڕانکاریی خێرای بەخۆوە بینیوە و چۆن خۆمان لەگەڵ ئەم گۆڕانکارییانە گونجاندووە".

 

کۆڕبەندی ئابووریی جیهان سەرەتا لەژێر ناوی "کۆڕبەندی بەڕێوەبردنی ئەوروپا" لە ساڵی 1971 دامەزرا، پاشان لە ساڵی 1987 ناوەکەی گۆڕدرا بۆ "کۆڕبەندی ئابووریی جیهان". کۆڕبەندی ئابووریی داڤۆس لە 50 ساڵی تەمەنیدا لە سەکۆیەکەوە بۆ دەوڵەمەندەکانی جیهان گۆڕدرا بۆ پلاتفۆرمێک بۆ دانووستاندنە گرینگەکانی نێوان وڵاتان.

 

لە ساڵی 1994دا شیمۆن پێرێز، وەزیری دەرەوەی ئەوکاتی ئیسرایل لەگەڵ یاسر عەرەفات، سەرۆکی پێشووی فەڵەستین لە پەراوێزی کۆڕبەندی ئابووریی جیهان گەیشتنە رێککەوتنی ئاشتی. پێشتر لە ساڵی 1988یشدا سەرۆکوەزیرانی یۆنان و تورکیا هەر لە پەراوێزی ئەم کۆڕبەندە کێشەکانی نێوانیان چارەسەرکرد.





ئەم هەواڵە 4795جار خوێندراوەتەوە
 
 
ڤیدیۆ گەلەری
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad