English | عربی | Kurdî دواهەواڵ
ڕاستەوخۆ  
 
لە هەولێر یادی ٢١ ساڵەی کۆچی دوایی محەممەد ماملێ کرایەوە
2020-01-23 [07:15 AM]

هەولێر – ZNA


لە هەولێر یادی ٢١ ساڵەی کۆچی دوایی محەممەد ماملێ کرایەوە و لۆگۆی زێڕینی وەزارەتی رۆشنبیری و لاوانی حکومەتی هەرێمی کوردستان بە ماڵباتی ئەو هونەرمەندە بەخشرا.

 

چالاکییەکە لەلایەن وەزارەتی رۆشنبیری و لاوانی حکومەتی هەرێمی کوردستان لەژێر ناونیشانی "دەنگێکی زیندووی هەموو سەردەمێک" بەڕێوەچوو و ژمارەیەک لە بەرپرسان و رۆشنبیران و هونەرمەندان ئامادەبوون.

 

رێوڕەسمەکە رێزلێنان بوو لەو هونەرمەندە کوردەی رۆژهەڵاتی کوردستان، لە ساڵیادی کۆچی دواییدا.

 

چالاکییەکە کاتژمێر پێنجی ئێوارەی رۆژی پێنجشەممە لە هۆڵی سەعد عەبدوڵڵا بەڕێوەچوو، تێیدا جگە لە خوێندنی ژمارەیەک وتار، خەسرەو ماملێ لەگەڵ گرووپیکی میوزیکی چەند بەرهەمێکی ماملێی باوکی پێشکەشکرد.

 

محەممەد ماملێ، کوڕی میرزا سەعیدی ماملێ (مام عەلی)یە، ساڵی ١٩٢٥ لە بنەماڵەیەکی ھونەرمەند و نیشتمانپەروەر، لە گەڕەکی ھەرمەنییانی مەھاباد لەدایك ‌بوو.

 

ھەر‌چەند بنەماڵەی ماملێ بە تێکڕایی ھونەرمەند و دەنگخۆش و گۆرانیبێژن، بەڵام محەممەد ماملێ ھونەرمەندێکی ھەڵکەوتە بوو کە لە دوای میرزا سەعیدی باوکی و ھەروەھا میرزا حوسێنی برای کە دە ساڵێک لە خۆی گەورەتر بووە، توانی وەک بەرپرس و نوێنەری ھونەریی ئەو بنەماڵەیە، بۆ ماوەی پەنجا ساڵ خزمەت بە هونەری کوردی بکات.

 

ماملێ لە سەردەمی لاوییەوە وەک ھونەرمەندێکی ئازادیخواز دەرکەوتووە و بە پێی ئەرکی کۆمەڵایەتی و کوردایەتی، خۆی پێگەیاندووە.

 

ماملی زیاتر لە 700 گۆرانی گوتووە، زۆربەی هەڵبەستەکانی وەفایی، سلێمانی شاوەلە، مارف ئاغایی، گۆران، هەژار موکریانی و هێمن موکریانی کردووەتە گۆرانی، زۆرجاریش خۆی شیعری بۆ گۆرانییەکانی نووسیوە

 

محەممەد ماملێ لە تەمەنی 74 ساڵی کۆچی دوایی کرد و بەرهەمەکانی لە هەرچوار پارچەی کوردستان هۆگری هەیە.

 

 





ئەم هەواڵە 538جار خوێندراوەتەوە
 
 
ڤیدیۆ گەلەری
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad