English | عربی | Kurdî دواهەواڵ
ڕاستەوخۆ  
 
هەڵەبچە و کۆرۆنا
2020-03-21 [10:47 AM]

نڤیسینا : غیاس خالد زێباری


دەما ناڤێ هەڵەبچە دهێت ، ئەو کارەسات و ماڵوێرانیا رژێما بەعس یا گۆڕ بگۆڕ ئەوا ل ۱٦ ێ ئادارا سالا ۱۹۸۸ سەر ڤی باژاری و گەلێ کورد ئینای بکارئینانا چەکێ کیمیاویێ قەدەغەکری کۆ بوویە ئەگەرێ شەهیدبوونا پێنج هزار سڤیلێن بێ گۆنەهـــ . ئەڤە مەزنترین کارەساتا وی سەردەمی بوو لسەر ئاستێ جیهانێ ، سەرەرای وێ چەندێ هەوێن ئەنفالکرنا گەلێ کورد و وێرانکرنا کوردستانێ کۆ بووینە ئەگەرێن شەهید و بێ سەرۆشوونکرنا سەدان هزار کوردا و سۆتنا ب هزاران گوندا . ئەڤ تاوانێن رژێما وی سەردەمیا عیراقێ د چارچۆڤێ هەوێن جینۆساید و قرکرنا کوردا و ژناڤبرنا بزاڤا رزگاریخوازیا کوردستانی بوو ، پڕانیا جیهانێ ژی لسەر ڤان تاوانان دبێ دەنگ بوون ، ئەڤە ژی تاوانەکا دیترا مرۆڤایەتی یە ، ژ پێخەمەت بەرژەوەندان . هەرچەندە پشتی ڤان تاوانان دوژمن و داگیرکار و دیڤەلانکێن وان د وێ باوەریێ دا بوون ، ئیدی چ بزاڤ و شۆرەش بناڤێ کوردستانی نەمان و ژ ناڤ چۆن ..! لێ سەرەرای وان کارەساتێن مەزن و بێدەنگیا وەڵات و سازیێن نیڤ دەولەتی ، بزاڤ و شۆرەشێن نشتیمانیێن کوردستانی د بەردەوام بوون . ئەڤەژی ژ ئەنجامێ ڕەوایا دووزا سیاسی یا کوردستانی و پابەندیا خەلکی بڤێ دووزێ و بلندیا هەستا نەتەوی و نشتیمانیا خەلکێ کوردستانێ . ئەڤە نیشانن کۆ خەلکێ کوردستانێ خودان ئیرادەیەکا بهێزە و خۆ لبەر روودان و کارەساتێن مەزن دگریت . هەر ئەڤ ئیرادەیا بهێزا خەلکێ کوردستانێ بوو پشتی دەمەکێ کێم لڤان کاڕەساتێن مەزن و بێ وێنە ، ب گیان و هەستەکا ئێکگرتی سەرهەلدانەکا سەرتاسەری دژی رژێما بەعسا گۆڕ ب گۆڕ بەرپا کر و پڕانیا دەڤەرێن کوردستانێ هاتنە رزگارکرن ل ئادارا ساڵا ۱۹۹۱ کۆ بوویە جهێ حیبەتیا جیهانێ . نهۆ ژی لدەمێ سەرهەلدانا ڤایڕۆسا کۆرۆنا ل وەڵاتێ چینێ و بەڵاڤەبوونا وێ ل پڕانیا وەڵاتێن جیهانێ کۆ بوویە مەترسیەکا کوشندە لسەر مرۆڤاتیێ و ئابوورێ جیهانێ ، و ل وەڵاتێن هەرە مەزن و خودان سیستەمێن بهێزێن سیاسی و ساخلەمی کاریگەریەکا ئێکجار مەزن کریە و ژیانا خەلکەکێ زۆر لناڤ بریە ، مینا چین ، ئیران ، ئیتالیا ، ئەلمانیا و ئسپانیا و ... هتد ئەگەر ئاریشە شیانێن ئابووری و سیستەمێ ساخلەمی بیت ، ئەڤ وەڵاتە دا شێن بەرهنگاریا ڤێ ڤایرۆسێ کەن و رێکێن خۆ دەربازکرنی بیننەڤە . لێ ئاریشە ئەوە خەلکێ وان وەڵاتان هزرێن مەزن بۆ ڤان ڕەنگە ئاریشە و بوویەران ناکەن ، دبیت باوەریا وان ئەو بیت کۆ وەڵاتێن وان خۆدان شیان و داهێنانن دێ شێن بەرهنگاریێ لێ کەن . ژلایەکێ دیتر نە پەگیریکرنا خەلکێ وان ب وان ڕێنما و بریاریێن وەڵاتێن وان درەنگ دەرکری فاکتەرەکێ دیترێ تەشەنەکرنا کۆرۆنایێ نە . دبیت خۆڕاگریا خەلکی و سیستەمێ خارنێ ژی کاریگەری هەبیت . لێ دیارە کۆ خەلکێ کوردستانێ مفا ل سەربۆر و کارەساتێن دەستکرد و سیاسی یێ لساڵێن بووری بسەر هاتی وەرگرتینە و ل بوویەرێن بچیک ژی خۆ دپارێزن ، گاڤێن بلەز و پێشوەختێن حکومەتا هەرێما کوردستانێ بۆ بەرهنگاربوونا کۆرۆنایێ و پاراستنا خەلکێ کوردستانێ دجهێ خۆدا بوون و باوەریا خەلکی ژی ب حکومەتا هەرێما کوردستانێ و دەسکەفتێن وان یێن نەتەوی و نشتیمانی ، خەلک ب وان بریار و ڕێنمایی یێن تۆندێن حکومەتێ پەیگیر کرن . خەلکێ مە زانی کۆ ب نەگۆهداریا رێنمایی یێن حکومەتا هەرێمێ دۆرنیە کارەساتێن مینا هەلەبچە و ئەنفالا دووبارە ببنەڤە ، چونکی نە دەسەڵاتا هەرێمێ خودان شیانێن مادی یێن زۆرە نەژی سیستەمێ ساخلەمیێ پێشکەفتی. لێ ئەڤ سەربۆر و رێکارێن هەرێما کوردستانێ بۆ بەرهنگاریا پەتایا ڤایرۆسا کۆرۆنایێ یا سەرکەفتی نیشا جیهانێ دا کۆ گەلێ کورد هەژی سەرخۆبوونێ و خۆ ڕێڤەبرنێ نە و دەسهەڵاتەکا هشیار و شارەزا هەیە د هەمی بوواران دا . چونکی زیانێن سنووردارێن ڤێ پەتایێ ل هەرێما کوردستانێ لگەل وەڵاتێن مەزن و خودان سەروەری شیان ناهێنە بەڕاوورد کرن ..! ئەز باوەرم جهێ دلخۆشیا رێکخراوا جیهانیا ساخلەمی ژی نە . ئەڤەژی جهێ شانازیێ نە . لێ نابیت خەلکێ کوردستانێ یێ پشت ڕاست بیت ، پێتڤی یە بۆ پاراستنا خۆ و وەڵاتێ خۆ گۆهداریا ڕێنما و بریار و راسپاردێن حکومەتا هەرێمێ بکەت و خەمساریێ نەکەت . چونکی ئەڤ ڤایرۆسە ل جیهانێ بەڵاڤ بوویە و رۆژانە خەلکەکێ زۆر ژناڤ دبەت و مەترسیەکا دژوار دروست کریە . ژبلی کۆ زاڵبوونا هەرێما کوردستانێ بسەر ڤێ پەتایێ ڤان رێکارێن توند بۆ پاراستنا ساخلەمیا مە ، دبیت ژلایێ کارگێری و ئابووری و سیاسی ژی ببنە فاکتەرێن پشتەڤانیەکا زێدەترا نیڤ دەولەتی بۆ کوردستانێ . چەوا کارەساتا کیمیا بارانکرنا هەلەبچە بوویە ناسنامەکا نەتەوی یا کوردی ، ئەڤ سەرکەفتن و خۆڕاگریا بەرامبەر کۆرۆنایێ ببیتە ناسنامەک بۆ هەرێما کوردستانێ و حکومەتا وێ .





ئەم هەواڵە 2926جار خوێندراوەتەوە
 
 
ڤیدیۆ گەلەری
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad