English | عربی | Kurdî دواهەواڵ
ڕاستەوخۆ  
 
ئیراق و سەرەدەریێن زارۆکانە لگەل کوردستانێ ...!
2020-05-02 [09:27 AM]

نڤیسینا : غیاس خالد زێباری


دەوڵەت و حکومەت لسەر بنەمایێن دەستووری و یاسایی دهێنە ئاڤاکرن و ڕێڤەبرن ،
رێکەفتنێن وەڵات و حکومەتان ژی دیسان بۆ پاراستنا بەرژەواندێن هەڤپشکێن دوو لایەنی یان زێدەتر دهێنە بەستن و بۆ دەمەکێ درێژ و ستراتیژی ، 
لدیف جۆرێ رێکەفتنێ دمینیت ، لێ پڕانیا وان دبنە بەڵگەنامێن فەرمی و ژلایێ نەتەوەیێن ئێکگرتی ژی دهێنە تۆمارکرن یان پەسند کرن . 
لەما پشتی گۆرینا حکومەت و دەسهەڵاتان ژی کار ب وان رێکەفتنا دهێتە کرن و ب هەر سەرپێچیەکێ لایەنێ خەمسار یان لادەر دهێتە سزادان . هەرێما کوردستانێ هەرێمەکا دەستووری و یاسایی یە دناڤ ئیراقا فیدرال و دەسهەڵات و ماف و ئەرکێن وێ د دەستوورێ هەردەمیێ ئیراقێ دا هاتینە دیارکرن ، 
هەر وەسا ماف و ئەرکێن حکومەت فیدرال بەرامبەر هەرێما کوردستانێ .

مخابن پشتی ب پشتەڤانیا سەرکردێن سیاسی یێن هەرێما کوردستانێ نەخاسمە سەرۆک مەسعود بارزانی  ، ئیراقا پشتی رژێما بەعس ل سالا ۲۰۰۳ لسەر ڤی بنەمایی هاتە ئاڤاکرن و ل مەترسیێن دژوار ژی رزگار بوو . 
هەرێما کوردستانێ ژی برەنگەکێ ئاڕەزوو مەندانە ب ئیراقا نوو هاتەڤ گرێدان ، چونکی ل سالا ۱۹۹۱ هەرێمەکا سەربەخۆ بوو و بێ دەولەتا ئیراقێ خۆ بڕێڤە دبر . 

مخابن پشتی بهێزبوونێ و دەسهەڵاتا ئیراقێ کەفتیە د دەستێ پڕانایا لایەنێن شیعی دا ، ڕەفتار و سەرەدەریێن حکومەتا ئیراقێ بەرامبەر هەرێما کوردستانێ هەمی سنوورێن مرۆڤایەتیێ و دەولەتداریێ و رێکەفتن و وەڵاتیبوونێ بن پێ کرینە ،
چ ڕێزگرتن بۆ ڕێکەفتن و سۆز و پەیمانێن دناڤبەرا واندا نەهێلاینە ،  مینا زارۆکان سەرەدەریێ دکەن ، 

چونکی زۆر جاران زارۆکەک دێ تشتەکی دەتە هەڤالەکێ خۆ و پشتی ناکۆکیەکا بچیت دناڤبەرا واندا درۆست دبیت ، دێ لسەر هەڤالێ خۆ سەپینیت وی تشتی بۆ بزڤرینیت . 
هزر ناکەت ئەو تشت نەهێلایە ، کۆ ب حەزا خۆ دایێ ، بەلکی تشتەکێ خارنێ بیت ، دێ ڕکێ گریت بڤێت و نەڤێت ، مابیت یان نەما بیت پێتڤی یە بزڤرینیت ...! ئەگەر نە دێ دەستا ل هەڤالینی و خزمایەتیێ بەردەت و بەردەوان د چیتە بەردەرگەهێ ماڵا وی و لپێش چاڤێن دایک و بابێن وی گریت و داخارا زڤراندنا تشتێ خۆ کەتەڤە . 

حکومەتا ئیراقێ ژی بەرامبەر هەرێما کوردستانێ مینا وان زارۆکان یا لێ هاتی ، هەر رۆژ بریارەکە و سەردەریەکا نوو دکەت ، نە گۆهداریا بەندێن دەستووری و نەژی پێگیریێ د رێکەفتنا دکەت ..! 

سەرەدەریەکا بەرۆڤاژی حوکمداریێ و دەولەتداریێ یە ، پاشەرۆژا بریار و رێکەفتنا کەفتیە د دەستێ هندەک سیاسیێن توند ڕەو و مەژیەکێ پڕی کەر و کین و دۆژمنکاری ، یاریا ب دەسهەڵاتێ دکەن . 

حکومەتا ئیراقێ دیلا ددەستێ وان ڕەنگە کەسان دایە ، گەهشتیە وی ئاستی لگەل گۆرینا هەر بەرپرسەکی ، گۆڕانکاریان ل رێکەفتنێن سیاسی و کارگێری و ستراتیژی دکەن .
ئانکۆ لدیڤ حەز و بەرژەوەندێن خۆ یاریا ب سیاسەتێ و دەوڵەتداریێ و رێکەفتن و پەیوەندیان دکەن . 
بۆدجە و مۆچێ هەرێما کوردستانێ بەنیشتە د دەڤێ واندا ، هەردەمێ دیت یان زانی کۆ هەرێما کوردستانێ یا بەرەڤ پێشچوون و گۆڕانکاریێن ئەرێنی دچیت ، 
دێ پەنایێ بۆ بڕینا وان بەن ، بۆ لاوازکرنا کوردستانێ ، هەر وەکی ل سەرەتایا سەرکەفتنێن پێشمەرگەهێن کوردستانێ لسەر تیرۆرستێن داعش ، نهۆ ژی سەرکەفتنێ ڤێ کابینا نوو یا حکومەتا هەرێما کوردستانێ بسەرۆکاتیا مەسروور بارزانی د وارێن کارگێری و سیاسی و ساخلەمی دا ب ڕەوا نابینن ، لەوما دڤێت ل ڕێکەفتنێن خۆ دەربارەی نەفتێ و مۆچێ خەلکێ کوردستانێ پەشێمان ببن ، 
ژلایەکی دڤێت ب ڕاگرتنا پشکا مۆچەخۆرێن کوردستانێ هەرێما کوردستانێ لاواز بکەن و توشی قەیرانێ بکەن ، ژلایەکێ دیتر دڤێت ناکۆکی و دووبەرەکیێ دناڤبەرا حزبێن سەرەکیێن کوردستانێ دا درۆست بکەن . 

لێ مەبەستا وان یا سەرەکی  سیاسی یە ، پشتی لسالا ۲۰۱۷ ب هێزا لەشکری نەشیای قەوارێ دەستووری یێ هەرێما کوردستانێ ژناڤ ببەت ،  ڤێ جارێ دڤێت هێزا ئابووری دڤان کاودانێت قەیرانیێن جیهانێ دا تاقیبکەت ، بۆ لاوازکرنا گەهێ هەرێما کوردستانێ . 

ئەگەر ڤێ ژی سەرنەگرت ، دێ هەوڵێن گۆرینا دەستوورێ ئیراقێ دەن ، ژپێخەمەت گۆرنا سیستەمێ سیاسی یێ ئیراقێ .

پێتڤی یە حزب و لایەنێن سیاسی یێن کوردستانێ ، ڤان هەوڵێن پشکا کاریگەرا شیعەیان ب پیلانەکا سیاسی یا مەزن دژی دەسکەفتێن نشتیمانی و نەتەوی یێن کوردستانێ ببینن ، و هەمی شیانێن خۆ یێن دبلۆماسی و سیاسی و ئابووری بکار بینن ، بۆ سەرنەگرتنا ڤێ پیلانا دارشتی و هەمی هەوڵا بدەن بۆ دابینکرنا مۆچێ مۆچە خۆرا . 

ب تایبەت د ڤان کاودانان دا کۆ ئیراق دقەیرانەکا سیاسی و ئابووری دایە و یێن نەشێن حکومەتەکێ پێک بینن و میلیشیایێن چەکدار دەسهەڵاتدارێن ڕەهانە و خۆ ل شوونا دەستوور و سیستەمی دانایە ...! و رەفتار و سەرەدەریێن زارۆکانە بەرامبەر دستوور و یاسا و رێکەفتنێن لگەل هەرێما کوردستانێ دکەن .





ئەم هەواڵە 244جار خوێندراوەتەوە
 
 
ڤیدیۆ گەلەری
باران بارین و لافاوی شاری دوبەی
شێرەکانیش یاری تۆپی پێ دەکەن
رووداوێكی سەیر پڵنگێك راوی سەگێك لەبەردەم دەرگای ماڵێك دەكات
ئاسكێك ده‌چێته‌ ناو سه‌رتاشخانه‌یه‌ك، ترس دروست ده‌كات
پشیله‌یه‌ك چۆن رێگری له‌ مارێك ده‌كات هه‌ڵبێت
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad