2020-07-08 [04:40 AM]

 بەداخ و پەژارەیەکی زۆرەوە نیوەڕۆی ئەمڕۆ، ھەڤاڵ و ھاوکاری دڵسۆزمان، نوسەر و رۆژنامەنووسی ناسراوی گەلەکەمان (شێرزاد عەبدولرەحمان) دوای ململانێیەکی زۆر لەگەڵ نەخۆشیدا، دوا ماڵئاوایی لێکردین. 

خوالێخۆشبوو(شێرزاد عەبدولڕەحمان) کەسایەتیەکی رۆشنبیر و بەئەزموون بوو و، تەمەنێکی پڕ بەخششی لەبواری رۆژنامەگەریی و نووسیندا بەڕێکرد ھەروەھا لە بواری ھونەریشدا گۆرانیبێژێکی خاوەن دەنگ و رەنگی تایبەتی خۆی بوو. 
ھەڤاڵی کۆچکردومان لە ساڵی(١٩٥٨)لە (گەڕەکی تەیراوە)ی شاری ھەولێر لەدایک بووە و، خوێندنی سەرەتایی لە قوتابخانەی(زانین)تەواو کردووە، پاشان قۆناغەکانی خوێندنی ناوەندی و دواناوەندی لە قوتابخانەی کۆماری تەواو دەکات و، سەرەتا لە ساڵی(١٩٧٠) پەیوەندی بە دەزگاکانی رادیۆ و تەلەفزیۆنی کوردی لە بەغدا دەکات و چەند گۆرانیەک تۆمار دەکات، لەساڵی(١٩٧٢)لە ئاھەنگێکی ھۆڵی (گەل) لە ھەولێر یەکەم سرودی بۆ(بارزانی نەمر)دەچڕی، دواتر لە بواری رۆژنامەگەری دا کاردەکات و وەک بچووکترین رۆژنامەنووس لەڕووی تەمەنەوە لە رۆژنامەی(ھاوکاری) و گۆڤاری(رەنگین) کاردەکات و بەسەدان ھەواڵ و ریپۆرتاژ بڵاودەکاتەوە. خوالێخۆشبوو(شێرزاد عەبدولڕەحمان) لەدوای راپەرینە شکۆدارەکەی گەلەکەمان بەھەمان شێوە رۆڵی باڵا و بەرچاوی ھەبووە لە کاری رۆژنامەنووسی وچالاکییە رۆشنبیری و رۆژنامەنوسیەکان و لە ئۆرگانەکانی راگەیاندنی پارتیمان کاردەکات لەوانە:
 بەڕێوەبەری نووسین لە رۆژنامەی (برایەتی)و (خەبات) و گۆڤاری(گوڵان) دواجاریش بەڕێوەبەری نووسینبوو لە رۆژنامەی(ھەولێر).
 ھەروەھا سەرنووسەری گۆڤاری(ھەرێمی کوردستان) و بەرپرسی نووسینگەی ھەولێری رۆژنامەی(الشرق الاوسگ)بووە. 
خوالێخۆشبوو یەکێک بوو لەو رۆژنامەنووسە چالاک و خاوەن ئەزموونانەی خزمەتێکی زۆری رۆژنامەگەریی و رۆشنبیریی کوردی کردووە، جێدەست و کارەکانی لە بواری رۆشنبیریی و رۆژنامەگەریی کوردیدا دیاروبەرچاوە، بۆیە کۆچی دوایی ئەو نووسەر و رۆژنامەنووسە، زیانێکی دیکەیە بۆ بواری رۆژنامەگەریی و رۆشنبیریی کوردیمان، ھیواخوازین ھاوخەمیی دۆست و دڵسۆزان و ھۆگرانی بەرھەمەکانی ناوبراو ببێتە مایەی دڵنەوایی خانەوادە و ھەموو لایەکمان و لە خەم و خەفەتتمان کەم بکاتەوە. 
خوالێخۆشبوو(شێرزاد عەبدولڕەحمان) وێڕای ھونەر و رۆژنامەنامەوانی نووسەرێکی خودان سەلیقە و بەتوانا و لێھاتووش بوو، خاوەنی(٢٤)کتێبە بەھەردوو زمانی کوردی وعەرەبی لەبواری رۆژنامەگەریی و سیاسەت و یادەوەریی و مێژوویی و ھونەریی.. 
لەم بۆنە خەمناکەدا پرسە و سەرەخۆشی خۆمان ئاراستەی خانەوادە بەڕێزەکەیی و کەس و کار و ھەڤاڵ و ھاوکارانی خوالێخۆشبوو و سەرجەم نووسەر و رۆژنامەنووسان دەکەین و شەریکی خەم و پەژارەیانین. 
داواکارین لە خوای گەورە گیانی ھەڤاڵی کۆچکردومان بەبەھەشتی بەرین شاد بکات و سەبوری و دڵنەوایش بە ھەموولایەک ببەخشێت. 
انا للە وانا الیە راجعون
 دەزگای رۆشنبیری و راگەیاندنی
 پارتی دیموکراتی کوردستان
 ٨ـی٧ـی٢٠٢٠