English | عربی | Kurdî دواهەواڵ
ڕاستەوخۆ  
 
بێبه‌شكران..لیستی یاریزانانی هەڵبژاردەی عێراق راگەیێندرا و تەنیا یەک کوردی تێدایە..
2021-03-17 [09:11 AM]

ZNA - ھەولێر


سریچکۆ کاتانیچ، راهێنەری هەڵبژاردەی عێراق لیستی ناوی یاریزانەکانی بۆ کەمپی مەشق و راهێنان لە ئوزباکستان و ئەنجامدانی یارییەکی دۆستانە لە بەرامبەر هەڵبژاردەی ئوزباکستان دایە یەکێتیی تۆپی پێی عێراق  وتەنیا یەک کوردی تێدایە.

ئەحمەد کۆچەر، ئەندامی دەستەی کاتیی یەکێتی تۆپی پێی عێراق، کە بۆ ئەنجامدانی ئەو کەمپە سەرۆکی شاندی عێراق دەبێت بە تۆڕی میدیایی رووداوی راگەیاند، کاتانیچ لیستی ناوی 25 یاریزانی داوەتە ئێمە بۆ ئەوەی لەگەڵ هەڵبژاردەکە گەشت بۆ ئوزباکستان بکەن، لە لیستەکەدا تەنیا ناوی یەک یاریزانی کوردی تێدایە کە ئەویش شێرکۆ کەریم، یاریزانی یانەی هەولێرە.

کۆچەر زیاتر گوتی " موهەنەد عەلی ناسراو بە میمی، بەهۆی ئەوەی یانەی سیلیەی قەتەری موڵەتی نەداوە ناتوانێت پەیوەندی بە هەڵبژاردەکەوە بکات".

ئەحمەد کۆچەر دەڵێت " رۆژی شەممە پشکنینی تایبەت بۆ سەرجەم یاریزانان و شاندی هەڵبژاردەکە دەکرێت، پاشان رۆژی دووشەممە بە فرۆکەیەکی تایبەت بەرەو ئوزباکستان بەڕێدەکەون و رۆژی 29ـی ئەم مانگە، یارییەکی دۆستانە بەرامبەر هەڵبژاردەی ئوزباکستان ئەنجامدەدەن و رۆژی 30ـی مانگ دەگەڕێنەوە بەغدا".

هەڵبژاردەی عێراق خۆی بۆ پاڵاوتنە هاوبەشەکانی جامی جیهانی 2022ـی قەتەر و جامی ئاسیای 2023ـی چین ئامادەدەکات، کە رکابەرییەکانی ماوەیەکی زۆرە بەهۆی ڤایرۆسی کۆرۆناوە راگیراون و یارییەکانی کۆمەڵەی سێیەم بەشێوەی گردبوونەوە لە بەحرەین بەڕێوەدەچن.

بانگهێشتکردنی تەنیا یەک یاریزانی کورد بۆ کەمپەکە و ئەو یارییە دۆستانەی بەرامبەر هەڵبژاردەی ئوزباکستان ئەنجامیدەدات، لەکاتێکدایە سەرهەنگ موحسین، ئەستێرەی کوردی یانەی ئەمانە بەغدا، باشترین ئاستی لەم وەرزەی خولی عێراقدا پێشکێشکردووە، دلۆڤان مەهدی، گۆڵپارێزی یانەی تەڵەبەش، بە ئاستێکی بەرزەوە دەرکەوتووە و چاوەڕواندەکرا یەکێکیان بۆ هەڵبژاردەکە بانگهێشتبکرێت، بەڵام جگە لە شێرکۆ کەریم، هیچ یاریزانێکی دیکەی کورد بۆ ئەو یارییە بانگهێشت نەکراوە.
 

 

هەڵبژاردەی عێراق لە رکابەرییەکانی کۆمەڵەی سێیەم یارییدەکات، لە پێنج یارییدا 11 خاڵی کۆکردووەتەوە و لە پلەی یەکەمی ریزبەندی کۆمەڵەکەیە، رۆژی 7ـی حوزەیرانی داهاتوو بەرامبەر کەمبۆدیا یارییدەکات، کە پێشتر بڕیاربوو بەرامبەر هۆنک کۆنگ یاریی بکات، بەڵام فیدراسیۆنی تۆپی پێی ئاسیا خشتەی یارییەکانی گۆڕی و ئەمەش ناڕەزایەتی عێراقی بەدوای خۆیدا هێنا و داوایکردووە، یارییەکان هەر بەپێی خشتەی پێشوو بەڕێوەبچن.

 

 

 

رووداو





ئەم هەواڵە 646جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad