English | عربی | Kurdî دواهەواڵ
ڕاستەوخۆ  
 
مەكتەبی سیاسی پارتی دیموكراتی كوردستان كۆچی دوایی هەڤاڵی تێكۆشەر(رەمزی شەعبان)رادەگەیەنێت
2021-04-04 [08:30 AM]

ZNA_ هەولێر


 

بە داخ و پەژارەیەكی زۆرەوە هەواڵی كۆچی دوایی هەڤاڵی تێكۆشەر و ماندوونەناس (رەمزی شەعبان) ئەندامی ئەنجوومەنی سەركردایەتی و بەرپرسی مەکتەبی کارگێڕی و دارایی پارتیمان رادەگەیەنین، کە بەھۆی نەخۆشی ئێوارەی دوێنێ رێکەوتی ٣ـی نیسانی ٢٠٢١، لە نەخۆشخانەیەکی وڵاتی تورکیا دوا ماڵئاوایی لێکردین. بەو بۆنە خەمناكەوە پرسە و سەرەخۆشی خۆمان ئاراستەی خانەوادە و كەسوكار و بنەماڵە تێكۆشەرەكەیان و جەنابی سەرۆك  و جێگری سەرۆکی پارتیمان و سەرجەم ھەڤاڵانی سەرکردایەتی و پێشمەرگە و کادیر و ئەندامانی پارتیمان دەكەین.

هەڤاڵی خوالێخۆشبوو (رەمزی شەعبان) لە ساڵی(1942)لە خێزانێكی ناسراو و تێكۆشەری دەڤەری ئامێدی لە شارەدێی بلێ لە دایك بووە، كەسایەتیەكی رۆشنبیر و ناسراوی گەلەكەمان بوو بە درێژایی تەمەنی خۆی و خانەوادەكەی لە خەبات و تێكۆشان لە ریزی پارتیمان دانەبڕاون. 
 لەساڵی(1958)پەیوەندی بە ریزەكانی پارتیەوە كردووە، وەك كەسایەتیەكی رۆشنبیر و چالاك و دیپلۆماتكارێكی ناسراو و سیاسەتمەدارێکی ھێمن و کارزان لە ژیانی پارتایەتی و سیاسەتدا بە دەیان لێپرسراویەتی لە ئەستۆ گرتووە و بەوپەڕی دڵسۆزیەوە بەئەنجامی گەیاندوون.
  هەڤاڵی خوالێخۆشبوو (رەمزی شەعبان) لە كۆنگرەی نۆیەمی پارتیمان بەئەندامی كۆمیتەی ناوەندی هەڵبژێردراوە ھەروەھا لە کۆنگرەکانی (١٠ و ١١ و ١٢ و ١٣)یشدا بەھۆی لێھاتووی و پێویستی بەتواناکانی بە ئەندامی سەرکردایەتی پارتیمان ھەڵبژێردراوەتەوە. ھەڤاڵی کۆچکردومان چەندین لێپرسراویەتی و ئەرکی گرنگی لە ناوخۆ و دەرەوەی کوردستان پێ سپێردراوە لەوانە: بەرپرسی مەكتەبی رێكخستن، بەرپرسی رێكخستنەکانی پارتی لە وڵاتی چیكۆسلۆفاكیا و وڵاتی سوێد، بەرپرسی لقی شەشی پارتیمان لە ئەوروپا، بەرپرسی پەیوەندییەكانی پارتیمان و بەرپرسی لقی یەك، هەروەها لەگەڵ هەڤاڵانی لە ئەوروپا رۆژنامەی(وڵات)ئۆرگانی لقی شەشی ئەروپای پارتیمانی دەركردووە و، رۆڵێكی دیار و كاریگەریشی هەبوو لە كار و چالاكییەكانی كۆمەڵەی خوێندكارانی كورد لە ئەروپا، دوا بەرپرسیاریەتیشی بەرپرسی مەكتەبی کارگێڕی و دارایی پارتیمان بووە. 
خوالێخۆشبوو(رەمزی شەعبان) جگە لەوەی پێشمەرگەیەكی خەباتگێڕ و ماندوونەناس بوو، رۆڵێكی دیار و كاریگەری رۆشنبیری و سیاسی و جەماوەریشی هەبوو، وەك نووسەر و مامۆستا بەشداری دەیان خوولی سیاسی و رۆشنبیریی پێگەیاندنی كادیرانی كردووە، هەروەها كادیرێكی دێرینی دڵسۆز و وەفاداری رێبازی بارزانی بوو  و بەشداری لە هەردوو شۆڕشی مەزنی ئەیلوول و شۆڕشی گوڵانی پێشكەوتنخواز كردووە، بۆیە لەدەستدانی ئەو تێكۆشەر و سەركردەیە خەسارەتێكی گەورەیە بۆ پارتی و گەلەكەمان.

دووبارە بە ناوی خۆمان و ھەڤاڵانی ئەنجوومەنی سەرکردایەتی پارتیمان پرسە و سەرەخۆشی خۆمان دووپات دەكەینەوە و ئومێدەوارین خانەوادەی تێكۆشەری خوالێخۆشبوو(رەمزی شەعبان)لە خەم و ئازار و كۆستی دیكە بە دوور بن و، لە خودای گەورە داواکارین روحی پاکی هەڤاڵی كۆچكردوومان بە بەهەشتی بەرین شاد بکات.

مەكتەبی سیاسی
 پارتی دیموكراتی كوردستان
٤ـی نیسانی ٢٠٢١





ئەم هەواڵە 340جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad