English | عربی | Kurdî دواهەواڵ
ڕاستەوخۆ  
 
پەیامی پارێزگاری هەولێر، لەیادی 34 ساڵەی کیمیاباران کردنی بالیسان و شێخ وەسان و دۆڵی خۆشناوەتی
2021-04-16 [10:51 AM]

ZNA_ هەولێر


 

بەناوی خودای بەخشندە و میهرەبان

لەیادی 34 ساڵەی کیمیاباران کردنی بالیسان و شێخ وەسان و دۆڵی خۆشناوەتی، دروود و سڵاو بۆ گیانی پاکی شەهیدانی کیمیاباران و لەناخی دڵیشمانەوە لەگەڵ ئێش و ئازاری بریندارەکان دەژین.

ئێواره‌ی ڕۆژی 16ی نیسانی 1987، ئه‌م ناوچه‌یه‌ کە خاوه‌ن چیڕۆكێکی پڕ له‌ سه‌روه‌رییه‌ له‌ مێژووی شۆڕشگێڕی كوردستاندا، ڕژێمی به‌عس به‌ ڕقێكی زۆره‌وه‌ هێرشی كرده‌ سه‌ری و شێخ وه‌سانان، بالیسان و كانی به‌ردێی كیمیاباران كرد و ژماره‌یه‌كی زۆر خه‌ڵكی خۆشه‌ویستی ئه‌و ناوچه‌یه‌ شه‌هید و برینداربوون، لە دوای دوو ڕۆژیش لە هێنانی بەشێک لەبریندارانی ئه‌و کارەساتە بۆ نه‌خۆشخانەکانی شاری هه‌ولێر، ڕژێمی بەعس دوای چەند ڕۆژێک پیاوه‌كانیان له‌ خێزانه‌كانیان جیا كردنەوە ‌و وه‌ك سه‌دان هه‌زار ئه‌نفالكراوی دیكه‌ی ووڵاته‌كه‌مان ئه‌نفالی کردن و تا ئێستاش بێ سه‌روشوێنن، ئه‌و مه‌رگه‌سات و کارەساتەی ڕژێمی بەعس به‌ سه‌ر ئه‌و ناوچه‌یه‌ی هێنا‌، بەکیمیابارانکردن و تێکدانی گوندەکان و تەقاندنەوەی كانیاوه‌كان به‌ TNT و سوتاندنی ڕه‌ز و باخه‌كانى، نموونه‌یەکی دیكه‌ی دڕنده‌یی بوو به‌رامبه‌ر بە خه‌ڵكی كوردستان ئەنجامدرا.

ده‌ڤه‌ری خۆشناوه‌تی وەک پارچەیەکی ئازیز و خۆشەویستی هەولێر له‌ شۆڕش و بزوتنەوەی ڕزگاریخوازی کوردستاندا، هەمیشە شوێنی باره‌گاكانی پێشمه‌رگه‌ بووە و ڕۆڵی مەزنی هەبووە‌ له‌ خزمه‌تكردن و حه‌واندنه‌وه‌ی پێشمه‌رگەدا، خه‌ڵكی خۆشناوه‌تی وه‌ك پێشمه‌رگه‌ بەدرێژایی مێژووی پڕسەروەری خەبات و تێکۆشانی گەلەکەمان زه‌حمه‌تییه‌كی یه‌كجار زۆریان دیوە کە هیچ كاتێك خزمه‌تكاریی دۆڵی بالیسان و شێخ وه‌سانان له ‌بیر ناكرێت و بۆ هەتا هه‌تایە بەزیندووی له‌ بیر و هزری شۆڕشگێڕ و پێشمه‌رگه‌کانی ئه‌وان ڕۆژان ده‌مێنێته‌وە.

وه‌كو پارێزگای هەولێر لەگەڵ ئەوەی کە پێمان وایە هه‌موو ناوچه‌یه‌كی سنووری پارێزگاکەمان شایانی ئاوه‌دانكردنه‌وه‌ و بایه‌خپێدانی زیاتره‌، بەتایبەتی ئەو دەڤەرە کە دوای ئەو هەموو کارەسات و وێرانکارییەی دەرهەقی ئەنجامدراوە، بەخۆشحاڵییەوە‌ ئێستا ئاوه‌دانییه‌كی به‌رچاوی بەخۆیەوە بینیوە، لەگەڵ ئه‌وه‌شدا له‌ ڕووی خزمەتگوزارییەوە هێشتا ماوه‌ كه‌ ده‌بێ له‌م ناوچه‌یه‌دا ئەنجامبدرێت، بۆیه‌ لێردا ‌دڵنیایی خەڵکی تێکۆشەر و قوربانیدەری ئەو دەڤەرە دەکەینەوە، ‌ئه‌وه‌ى له‌ تواناى ئێمه‌دا بێت بۆ خزمه‌تكردنى زیاترى ناوچه‌که‌ جێبه‌جێى ده‌كه‌ین و ئەوەی لەدەستمان بێت ئەنجامیدەدەین بۆ گەیاندنی خزمەتگوزاری و ئاوەدانکردنەوەی زیاتری دەڤەرەکە، خزمه‌تكردن‌ ئه‌ركى ئێمەیە و ئێوەش‌ شایسته‌ى هه‌موو خزمه‌تگوزارییه‌كن.

دووبارە سه‌ری ڕێز و نه‌وازش بۆ شه‌هیدانی ئه‌و ناوچه‌یه‌ و هه‌موو كوردستان دادەنوێنین 

ئومێد خۆشناو
پارێزگاری هەولێر
2021.4.16





ئەم هەواڵە 313جار خوێندراوەتەوە
 
 
ڤیدیۆ گەلەری
لە شەقامێکی قەرەباڵغ منداڵێک لە سندوقی ئۆتۆمبێل دەکەوێتە خوارەوە
لێدانی سەدە ، تا ئێستا لێدانی وانەبووە
شه‌قامێك رۆده‌چێت و دوو ژن ده‌خوات
بەھرەیەکی سەرنج راکێشە
باران بارین و لافاوی شاری دوبەی
 
 

پێناسە | گەلەری | ئەرشیف | پەیوەندی

پێبژاردنی پۆلیسی هاتووچۆ هەولێر | دهۆک | سلێمانی

هەموو مافەکان پارێزراون بۆ ئاژانسی هەواڵی زاگرۆس

Developed By: Omed Sherzad