لە سەر فەرمانی مەسرور بارزانی، سەرۆكی حكوومەتی هەرێمی كوردستان، لەم نزیکانە بە گوژمەى ( 189 ملیار و 670 ملیۆن دینار ) لەسەر بودجەى حکومەتى هەرێم، دەستدەکرێت بە جێبەجێكردنی پڕۆژەی ستراتیژیی ئاوی قوشتەپە و گوندەكانی دەوروبەری لە سنووری پارێزگەی هەولێر، كە لە ڕۆژێكدا توانای بەرهەمهێنانی ( 72 ) هەزار مەتر سێجا ئاوی خواردنەوەی هەیە و كێشەی كەمئاوی سنوورێكی فراوانی دەوروبەری هەولێر چارەسەر دەكات.
پڕۆژەکە، کە لەلایەن بەڕێوەبەرایەتیی گشتیی ئاو و ئاوەڕۆەوە سەرپەرشتیی تەواوكردنی دەكرێت، یەكێكە لە پڕۆژە گەورە و ستراتیژییەكانی شارى هەولێر و سەرچاوەی ئاوەكەی لە زێی بچووك لە سنووری گوندی قەشقە دابین دەكرێت و پێكهاتووە لە سێ خەزانی گەورەی ئاو، یەكێك لەو خەزانانە لە سنووری بیستانەیە و یەكێكیشیان لە قوشتەپەیە.
بە گشتی پڕۆژەكە كێشەی كەمئاوی لە قوشتەپە و بیستانە و زیاتر لە 60 گوندی سنوورەكە بە تەواوەتی چارەسەر دەكات و دەبێتە هۆی بووژانەوە و ئاوەدانیی ئەو گوندانە و بەردەوامی دابینكردنی ئاوی خواردنەوە بۆ ئەو سنوورە فراوانەی دەوروبەری هەولێر و چەندین ناوچەی دیکەى پیشەسازی و كارگە و بازاڕ و پڕۆژەی جۆراوجۆرى دیکە كە دەكەونە سنووری ئەو پڕۆژەیەوە.