وەزارەتی دەرەوەی ئێران، بەڕێوەبەری کاروباری باڵیۆزخانەی بەریتانیا لە تارانی بانگ کرد و ناڕەزایەتیی توندی تاران بەرانبەر گەمارۆی نوێی بەریتانیا لەسەر کەرتی کەشتیوانیی ئێرانی پێ ڕاگەیاند
وەزارەتی دەرەوەی ئێران لە ڕاگەیاندراوێکدا بە ئاماژەکردن بەوەی گەمارۆکانی بەریتانیا لە دژی کەرتی کەشتیوانیی ئێران نایاسایی و بێ‌پاساون، ڕایگەیاندووە ئەم گەمارۆ نوێیانە، بە پێچەوانەی یاسا نێودەوڵەتییەکان و لە دژی بنەمای ئازادیی دەریاوانی و بازرگانیی دەریایان.
وەزارەتی دەرەوەی ئێران هەروەها ڕەتی کردووەتەوە لە جەنگی ئوکراینادا پشتیوانیی سەربازیی بۆ ڕووسیا ناردبێ و جەختیشی کردووەتەوە هاوکارییەکانی کۆماری ئیسلامیی ئیران و ڕووسیا لە بوارەکانی بەرگری و ئەمنیدا، لە دژی هیچ وڵاتێکی دیکە نین.
ڕۆژی سێشەممەی ئەم هەفتەیە بەریتانیا و وڵاتانی ئەندام لە یەکێتیی ئەورووپا، بە هۆی پشتیوانیی ئیران لە ڕووسیا و ناردنی مووشەک بۆ ئەم وڵاتە، کۆمەڵێک گەمارۆی نوێیان خستە سەر کەرتی کەشتیوانیی ئێران.