باڵیۆزخانەی ڕووسیا لە دیمەشق ڕۆژی هەینی داوای لە هاووڵاتیانی کرد سوریا بەجێبهێڵن. باڵیۆزخانەکە لە ڕاگەیەندراوێکدا بڵاویکردەوە کە بەهۆی سەختی بارودۆخی سەربازی و سیاسی لە سوریا، داوا لە هاووڵاتیانی دەکات کە بە زووترین کات و لە ڕێگەی گەشتە بازرگانییەکان و ئەو فڕۆکەخانانەی لەبەردەستدایە، ئەو وڵاتە بەجێبهێڵن.
باڵیۆزخانەی ڕووسیا لە ڕاگەیەندراوەکەدا کە لە کەناڵی تێلێگرامی خۆی6ی مانگی دوازدە بڵاویکردووەتەوە، پێشڕەوی یاخیبووانی نەیاری ئەسەد بە “دۆخێکی قورسی سەربازی و سیاسی لە سوریا” ناودێر دەکات.
چەکدارانی هەیئەت تەحریر ئەلشام و هاوپەیمانەکانی کەلەلایەن تورکیاوە پاڵپشتی دەکرێن، لە 27ی مانگی یازدەوە هێرشەکانی خۆیان بۆ سەر باکووری سوریا وەک بانگەشەی دەکەن بە ئامانجی ڕووخاندنی بەشار ئەسەدی سەرۆکی وڵاتەکە کەلەلایەن ڕووسیا و ئێرانەوە پاڵپشتی دەکرێت، دەستپێکردوە.
باڵیۆزخانەی ڕووسیا ڕایگەیاندووە کە پلانیان هەیە سەرەڕای هێرشەکانی ئەو گرووپە یاخیبووەکان، بەردەوام بێت لە کارکردنی ئاسایی خۆی لە سوریا.
شرۆڤەکارانی سەربازی دەڵێن وێنەکانی مانگی دەستکرد دەریدەخەن کە هێزی دەریایی ڕووسیا کەشتییە جەنگییەکانی لە بنکەکەی لە بەندەری تەرتووسی سوریا چۆڵ کردووە. ڕووسیاش ڕایگەیاندووە لە ڕۆژهەڵاتی دەریای ناوەڕاست مەشق و ڕاهێنانی سەربازی ئەنجام دەدات.
VOA