لە هەولێر و دهۆک نرخی کرێی مۆلیدە راگەیاندرا و لێپرسراوی لێژنەی مۆلیدە ئەهلییەكان لە پارێزگای هەولێر جەخت دەکاتەوە، بەهۆی پێدانی کارەبای زیاتر، مانگی 12 پارەکە زیادی کردووە.
ئەندازیار قارەمان مەولوود، لێپرسراوی لێژنەی مۆلیدە ئەهلییەكان لە پارێزگای هەولێر، ڕایگەیاند: “نرخی ئەمپێری كارەبای مۆلیدە ئەهلییەکان، لەناو سەنتەری هەولێر، بۆ مانگی 12ی 2024، بۆ هەر ئەمپێرێك كارەبا كەمترینی 14 هەزار و 500 دینارە، زۆرترینیشی 18 هەزار و 750 دینارە.”
جەختی کردەوە، نرخی ئەمپێری کارەبای موەلیدە بەراورد بە مانگی 11، لە مانگی 12دا زیاتر بووە، گوتیشی: “لە مانگی 12دا کارکردنی مۆلیدەکان لەنێو شاردا 15 کاتژمێر و 30 خولەک بووە و لە دەورووبەریش 13 کاتژمێر و 30 خولەک بووە، بەراورد بە مانگی 11 مۆلیدەکان کارەبای زیاتریان داوە.”
لە لایەكی دیکەوە، بەپێی خشتەی کۆمەڵەی مۆلیدە ئەهلییەکانی دهۆک، لەنێو سەنتەری شاری دهۆک کەمترین نرخی هەر ئەمپێرێک 16 هەزار و 500 دینارە و زۆرترینیشی 20 هەزار 250 دینارە.