وه‌زیری ته‌ندروستی حكومه‌تی هه‌رێمی كوردستان، بۆ كۆچی دوایی دكتۆر ده‌شتی دزه‌یی، پرسه‌نامه‌یه‌كی ئاراسته‌ی خانه‌واده‌كه‌ی كرد، رایگه‌یاند، خوالێخۆشبوو پزیشکێکی خۆشەویستی هاوڵاتیان بوو، خزمەتی زۆری مرۆڤدۆستی و هەژاران و فێرکردنی چەندین نەوەی پزیشکی کردووە.
ئه‌مه‌ش ده‌قی پرسەنامه‌كه‌یه:
بە خەمو پەژارەی یەکجار زۆرەوە بەناوی خۆمان و وەزارەتی تەندروستی پرسە و سەرەخۆشی لە خانەوادەی خوالێخۆشبوو پڕۆفیسۆر (د. دەشتی دزەیی) پزیشکی پسپۆڕی پێشەنگ و دێرین و مامۆستا و زانای پزیشکی و کەسایەتی شاری هەولێر دەکەین کە بەداخەوە بەهۆی نەخۆشی کۆچی دوایی کرد.
خوالێخۆشبوو پزیشکێکی پێشڕەوی بواری پزیشکی کوردستان و دڵسۆز و بەوەفا و خۆشەویستی هاوڵاتیان بوو، خزمەتی زۆری مرۆڤدۆستی و هەژاران و هاوڵاتیان و چارەسەری نەخۆشی و بواری ئەکادیمی و فێرکردنی چەندین نەوەی پزیشکی کردووە، ڕۆڵی گرنگ و مێژوویی هەبووە لە پێشکەشکردنی خزمەتگوزاری تەندروستی بۆ پێشمەرگە قارەمانەکان و بزوتنەوەی رزگاریخوازی کوردستان، بەردەوام بەڕێکوپێکی و بێ ماندووبوون خزمەتی زۆری هاوڵاتیان و پێگەیاندنی چەندین مامۆستا و پێگەیاندنی پزیشکی کردووە.
داواكارین لە خوای گەورە خوالێخۆشبوو بە بەهەشتی بەرین شاد بكات و سەبووری بە خانەوادە و كەسوكار و دۆستانی ببەخشێت.
انا لله وانا الیه راجعون . . .
د. سامان حسین بەرزنجی
وەزیری تەندروستی/ حکومەتی هەرێمی کوردستان
٢٥ کانونی دووەم ٢٠٢٥
