ئه‌ندامێ ئه‌نجوومه‌نێ نوینه‌رێن عیراقێ ل فراکسیۆنا پارتی دیموکراتی کوردستان راگەهاند، کو ل دووماهى یا ڤێ حه‌فتیێ شانده‌كێ لژنا دارایى و ئابوورى یا په‌رله‌مانێ عیراقێ دێ سه‌ره‌دانا هه‌رێما كوردستانێ كه‌ت، بۆدجێ و مووچه‌ى هه‌رێما كوردستانێ دێ بابه‌تێ سه‌ره‌كیێ كومبوونان بن.
خه‌لیل غازى دۆسكى، ئه‌ندامێ ئه‌نجوومه‌نێ نوینه‌رێن عیراقێ ل فراکسیۆنا پارتی دیموکراتی کوردستان، ب ئاژانسا نوچەیا زاگرۆس راگەھاند: ژڤانه رۆژا سێ شه‌مبی ب شه‌ف شانده‌كێ لژنا دارایى و ئابوورى یا ئه‌نجوومه‌نێ نوینه‌رێن عیراقێ بگه‌هیته هه‌رێما كوردستانێ كو ئێك ژ ئه‌ندامێن شاندى مه، رۆژا جارشه‌مبی ژڤانه ل گه‌ل وه‌زاره‌تا دارایى وئابوورى و وه‌زاره‌تێن په‌یوه‌ندار كو گرێدایى ب بۆدجه و مووچێ هه‌رێما كوردستانێ ڤه كومبین، مه‌ره‌م ژ كومبوونێ ئه‌وه هایداربوونه ل سه‌ر ئاریشێن دناڤبه‌را هه‌ر دو ئالیان دا و دیسا كومكرنا پێشنیار و دیتنا رێكێن چاره‌سه‌ریێ یه بۆ چاره‌سه‌ركرنا ئاریشان.
خه‌لیل غازى دۆسكى، ئه‌ندامێ ئه‌نجوومه‌نێ نوینه‌رێن عیراقێ ل فراکسیۆنا پارتی دیموکراتی کوردستان بۆ ئاژانسا نوچەیا زاگرۆس ئەوچەندەش گوت، كو دانا مووچێن فه‌رمانبه‌رێن هه‌رێما كوردستانێ به‌رده‌وامى هه‌بیت و تێبینیێن ل سه‌ر لیستێن مووچان بهێنه چاره‌سه‌ركرن و كار زێده‌تر به‌ره‌ف چاره‌سه‌ربوونێ بچیت هه‌تا ل دووف وێ رێكه‌فتنا حوكمه‌تا هه‌رێما كوردستانێ ل گه‌ل ئه‌نجوومه‌نێ ئابووریێ عیراقێ فیدرال لحه‌فتیێن بووررى هاتیه ئه‌نجامدان.
رێباز یونس