وتەبێژی بەرێوەبەرایەتی بەرگریی شارستانیی هەولێر رایگەیاند، کە دوو رووداوی گەورەی ئاگر كەوتنەوە لە هەولێر روویاندا، یەكێكیان لە كارگەیەك و ئەوی دیكەش لە زیاتر لە 500 دۆنمی بەگەنم چێندراو بوو كە سووتا.
موقەدەم شاخەوان سەعید، وتەبێژی بەرێوەبەرایەتی بەرگریی شارستانیی هەولێر، بە ئاژانسی ھەواڵی زاگرۆسی راگەیاند: دوای نیوەڕۆی ئەمڕۆ ئاگر لە زەوی جووتیارانی گوندی سمایل ئاوای سەر بە قەزای خەبات كەوتەوە، لەلایەن تیمەكانمانەوە بەرگریی شارستانی كۆنتڕۆڵ كرا، بەهۆی رووداوەكەوە 525 دۆنم زەوی چێنراو بە گەنم، كە خاوەنەكەی هەشت جووتیاری ناوچەكەن سووتاوە، هەروەها هۆكاری ئاگرەكە دیار نییە و پێدەچێت بەهۆی سووتانی پوش و پەڵاشەوە تەشەنەی سەندبێت.
وتەبێژی بەرێوەبەرایەتی بەرگریی شارستانیی هەولێر گووتی: رووداوی دووەمی ئاگر كەوتنەوەی ئەمڕۆ لە كارگەیەكی ریسایكلینی كارتۆن لەسەر رێی گوێر روویدا و بەهۆیەوە بە نزیكەیی تەواوی كارگەكە سووتا.
هەروەها موقەدەم شاخەوان سەعید، وتەبێژی بەرێوەبەرایەتی بەرگریی شارستانیی هەولێر ئەوەشی بۆ ئاژانسی ھەواڵی زاگرۆس خستەروو، کە كارگەكە مۆڵەتی نییە و مەرج و رێنوێنییەكانی بەرگریی شارستانی جێبەجێنەكردووە، رووداوەكەش بەهۆی كەمتەرخەمییەوە بووە.
رێباز یونس