ل دیف نڤێسینەکا فەرمی یا وەزارەتا پلان دانانا ھەرێما کوردستانێ ژبۆ ئەنجامدانا سەرژمێریا گشتی بۆ گەشەپێدانێ کو بریارە ل مەھا (١١) یا ئەڤ ساڵە ل عیراقێ وھەرێما کوردستانێ بھێتە سازکرن ئەڤرۆ سپێدێ رۆژا پێنجشەمبی ٣٠ێ گولانا ٢٠٢٤ ێ د.عەلی تەتەر پارێزگارێ دھۆکێ ب ئامادەبونا ماجد سەید سالح جێگرێ پارێزگارێ دھۆکێ سەرپەرشتیا کۆمبوونەکا بەرفرەهـ دگەل رێڤەبەرێن گشتی ولایەنێن پەیوەندیدار کر بو بجھئینانا ناڤەروکا نڤێسینا وەزارەتا ناڤبری.
پارێزگارێ دھۆکێ گرنگیا ئەنجامدانا سەرژمێریێ بەرچاڤکر و گوت: ئەڤێ سەرژمێریێ دێ ئەنجامێن خۆ یێن باش ھەبن دھەموو بوارەکێدا نەخاسمە دبیاڤێ داتایێن گشتی و مرۆڤایەتی و ئابوری دا و ژ پشکدارێن کۆمبوونێ خواست کو گرنگیێ ب بابەتی بدەن و دھاریکاربن بۆ ھاندانا ھاوڵاتیان کو پشکداریێ تێدا بکەن بۆ سەر ئێخستنا ڤێ پروسا نیشتمانی وپشتەڤانیا پارێزگەھێ نیشان دا بۆ ھەر ھاریکاریەکێ.
دکۆمبوونێدا بریار ھاتە دان ولیژنەکا بلند ب سەروکاتیا پارێزگارێ دھۆکێ وئەندامەتیا رێڤەبەرێن گشتی ھاتە پێک ئینان ھەروەسا ل رۆژێن بھێت کۆمبوون ل سەر ئاستێ قەزا وناحیا ژی بھێنە کرن ولیژنێن لاوەکی ل سەر ئاستێ ھەموو قەزا وناحیا بھێنە پێکئینان دا بەرھەڤیا بۆ سەرژمێریێ بکەن.
دھێتە چاڤەرێکرن سەرژمێریا گشتی بۆ گەشەپێدانێ ل ر ۆژا (٢٠-١١-٢٠٢٤) ل سەرانسەری عیراقێ وھەرێما کوردستانێ بھێتە ئەنجامدان.
ھەروەسا سوبەھی رێکەفتی ٣١-٥-٢٠٢٤ سەرژمێریا ئەزمونی دێ ل چەند تاخا ل سەنتەرێ قەزا سێمێلێ وھژمارەکا گوندا ھێتە ئەنجامدان.