ئاژانسی هەواڵی زاگرۆس

بایدن یاسایەکی لە دژی ئێران پەسند کرد

سەرۆکی ئەمریکا ئەو یاسایەی واژۆ کرد کە لەلایەن ئەنجومەنی پیرانی وڵاتەکەیەوە پەسند کرا و بە یاسای مەهسا (ژینا) ناسراوە و تێیدا سزای توند دژی حکوومەت گیراوەتە بەر و هەناردەکردنی نەوت و چەکی ئێرانی کردووەتە ئامانج و بەکارهێنانی تەکنەلۆژیای ئەمریکا لە ئێران قەدەغە کراوە و سزاش خراوەتە سەر ڕێبەرانی باڵای ئەو وڵاتە و نووسینگەی ڕێبەر و سەرۆککۆماری ئێران دەخرێنە لیستی سزاکانی ئەمریکاوە.
جۆو بایدن سەرۆکی ئەمریکا، ئەو یاسایەی واژو کرد بە ”یاسای مەهسا” یان ژینا ناسراوە و بریتییە لە سزای توند دژی حکوومەتی ئێران لە بوارەکانی هەناردەکردنی نەوت، هەناردەکردنی مووشەک و درۆن، بەکارهێنانی تەکنەلۆژیا بۆ پەرەپێدانی تیرۆر، هەروەهائاشکراکردنی داراییەکانی بەرپرسان، پێشگرتن لە ئاڵوگۆڕی وزە لە نێوان ئێران و چین و، سزادانی نووسینگەی ڕێبەر و سەرۆککۆماری ئێران.
یاساکە لە پەسندکردنی ٦ پرۆژەبڕیار لەلایەن ئەنجومەنی پیرانی ئەمریکاوە پێک هاتووە کە بریتین لە:
کەمکردنەوەی داهاتە نەوتییەکانی حکوومەتی ئێران، بۆ ئەوەی ئەو وڵاتە نەتوانێت درێژە بە ناسەقامگیرکردنی ناوچەکە و پشتگیری لە تیرۆریزمی نێودەوڵەتی بدات و، توانای پەرەپێدان و بەدەستهێنانی چەکی کۆمەڵکوژی نەبێت و دەست لە سەرکوتی خەڵکی وڵاتەکەی و پێشێلکردنی مافەکانی مرۆڤ هەڵگرێت.
یاساکە پەرەپێدانی بەرنامەی مووشەکی بالیستی و درۆنی ئێران دەکاتە ئامانج و سەرۆکی ئەمریکا ڤیزای سەردانی وڵاتەکەی بەو کەس و دامەزراوە و بەرپرسانەی وڵاتان نادات کە پێوەندیی ڕاستەوخۆیان لەگەڵ بەرنامەی مووشەکی و درۆنی ئێران هەیە و داراییەکانیشیان لە ئەمریکا ڕادەگرێت.
یاساکە هەناردەکردنی ئەو تەکنەلۆژییە ئەمەریکییانەی ئەگەری هەیە لە بەرنامەی مووشەکی و درۆنی ئێراندا بەکار بێن بۆ هەمیشە قەدەغە دەکات.
بەپێی یاساکە، دەبێ سەرۆکی ئەمریکا بەراوردێک لە سامان و سەرمایەی بەشێک لە بەرپرسانی ئێران لە ناوخۆ و دەرەوەی ئەو وڵاتە بخاتە ڕوو، وەزارەتی گەنجینەی وڵاتەکەش کار بکات بۆ ئەوەی هەژماری ئەو کەسانە لە دامەزراوە داراییەکانی دەرەوەی ئێراندا دابخات.
هاوکات ئەم یاسایە فرۆشتنی نەوت و بەرهەمە نەوتییەکانی ئێران بە چین کەم دەکاتەوە و سەرۆکی ئەمریکا لە قۆناغی جیاجیادا لەسەر ئەو دامەزراوە چینییانەی نەوت و بەرهەمە نەوتییەکانی ئێران دەکڕن ڕاپۆرتێک دەخاتە ڕوو، بانکەکان و دامەزراوە داراییەکانی ئەمریکاش هەژماری ئەو دامەزراوە چینییانە دادەخەن و هەژماری دیکەیشیان بۆ ناکەنەوە. ئەمەش لە کاتێکدایە چین کڕیاری سەرەکیی نەوتی ئێرانە.
هەر بەپێی یاساکە، بەهۆی پێشێلکردنی مافەکانی مرۆڤ و پشتگیری لە تیرۆریزم، ئایەتوڵڵا عەلی خامنەیی، ڕێبەر و ئیبراهیم ڕەئیسی، سەرۆککۆماری ئێران و نووسینگەکانیان دەخرێنە لیستی سزاکانی ئەمریکاوە.

هەواڵی پەیوەندیدار

شاندێكى سه‌رۆكايه‌تيى هه‌رێمى كوردستان سه‌ردانى واشنتۆن ده‌كات

یاسین

وه‌زیری ده‌ره‌وه‌ی ئه‌مه‌ریكا گه‌یشته‌ سعودیه‌

سەڵاح

سوودانی لەگەڵ لایەنە براوەکانی ئەنجوومەنی پارێزگای کەرکوک کۆدەبێتەوە

یاسین