سەرۆکی حکوومەتی هه‌رێمی كوردستان، بەردی بناخەی بازاڕی هاوچەرخی سەوزە و میوەی ئاکرێ دادەنێت

ئەمڕۆ سێشەممە 6/11 کاتژمێر 10:30  مه‌سرور بارزانی سەرۆکی حکوومەتی هه‌رێمی كوردستان، بەردی بناخەی بازاڕی هاوچەرخی سەوزە و میوەی ئاکرێ (عەلوە) دادەنێت .

پرۆژەی سەنتەرى بازرگانى و عەلوەى هاوچەرخی ئاكرێ لە ژێر ناونیشانی (ئامانجمان بەرەو پێش بردنى كەرتى كشتوكاڵە لە هەرێمى كوردستان) لە بەڕێوەبەرايەتى گشتیى وەبەرهێنانى دهۆك مۆڵەتى وەرگرتووە و لەلایەن کۆمپانیایەکی ناوخۆیی کەرتی تایبەت جێبەجێ دەکرێت.

پرۆژەى عەلوەى هاوچەرخی ئاكرێ دووەم گەورەترين عەلوەيە لە ئاستى هەرێمى كوردستان و عێراق بە گوژمەى 22 مليۆن دۆلار لە سەر ڕووبەری 245 هەزار مەتری دووجا دروست دەکرێت و دەکەوێتە سەر ڕێگەى سەرەكى دهۆك – ئاكرێ.

دروستكردنى عەلوەى هاوچەرخی ئاکرێ بە دەستپێكى شۆڕشێكى نوێى سەردەميانەى بە بازاڕكردن و بە كۆگاكردنى بەرهەمە كشتوكاڵییەکان لە هەرێمى كوردستان دادەنرێت، چەندين كۆگاى گەورە، ساردكەرەوە، گۆڕەپانى سەوزە و میوە لەگەڵ کۆگای ئالیک لە خۆ دەگرێت.

لە بەشی ساردخانەکاندا بەرهەمە كشتوكاڵييەكان دەتوانرێت بۆماوەیەکی درێژ کۆگا بکرێن.

هەروەها لە ڕێگەى بنكەى فرۆشتنى ڕاستەوخۆوە، جوتياران و بازرگانانى كەرتى كشتوكاڵ دەتوانن بە ئاسانى بەروبوومەكانيان بە بازاڕى بكەن.

لە عەلوە هاوچەرخەکەدا گرنگى دراوە بە كەرتى خزمەتگوزارى گشتى وەك بنكەى تەندروستى، بنكەى ئاگر كوژێنەوە، بنكەى پۆليس، وێستگەى سووتەمەنى، گۆرەپانى وەستانى ئوتومبێل، ناوچەى سەوزايى كە بە شێوازێكى سەردەميانە بنیاد دەنرێت.

پێکهاتەی پرۆژەی عەلوەی هاوچەرخی ئاکرێ:

19 دوکان بەڕووبەری 50 مەتر دووجا

20 کۆگا بەڕووبەری 450 مەتر دووجا

48 عەلوە بەڕووبەری 150 مەتر دووجا

35 بەڕووبەری 450 مەتر دووجا

112 عەلاف بەڕووبەری 135 مەتر دووجا

1 گۆڕەپانی سەوزە بەڕووبەری 4755 مەتر دووجا

8 ساردکەرەوەی بەفرگر بەڕووبەری 1000 مەتر دووجا

11 ساردکەرەوەی ئاسایی بەڕووبەری 1000 مەتر دووجا

2 قەپان بەڕووبەری 290 مەتر دووجا

1 ناوچەی سەوزایی بەڕووبەری 39 هەزار و 861 مەتر دووجا

1 نەمامگە بەڕووبەری 2958 مەتر دووجا

1 گۆڕەپانی وەستانی ئۆتۆمبێل بەڕووبەری 9716 مەتر دووجا

1 بنکەی ئاگرکوژێنەوە بەڕووبەری 600 مەتر دووجا

1 بنکەی پۆلیس بەڕووبەری 600  مەتر دووجا

1 وێستگەی سووتەمەنی بەڕووبەری 2600 مەتر دووجا

1 ڕێستۆرانت بەڕووبەری 2160.7 مەتر دووجا

1 مزگەوت بەڕووبەری 1025 مەتر دووجا

1 نووسینگەی کارگێڕی عەلوە بەڕووبەری 600 مەتر دووجا

1 ناوچەی کراوە بەڕووبەری 33 هەزارو 985 مەتر دووجا