ئاژانسی هەواڵی زاگرۆس

سه‌رۆك نێچيرڤان بارزانى پيرۆزبايى له‌ ئافره‌تان ده‌كات

 

يادى هه‌شتى مارس، ڕۆژى جيهانيى ئافره‌تان، به‌ گه‌رمى له‌ هه‌موو ئافره‌تانى كوردستان، عێراق و جيهان پيرۆز ده‌كه‌م، له‌ هه‌وڵ و كار و خه‌باتياندا بۆ به‌ده‌ستهێنانى يه‌كسانى و ته‌واوى مافه‌كانى ژنان، وه‌ك هه‌ميشه‌ به‌وپه‌ڕى بڕوا و تواناوه‌ هاوكار و پشتيوانيانم، هيواى به‌ره‌وپێشچوونى به‌رده‌وام و سه‌ركه‌وتنيان بۆ ده‌خوازم.

له‌م ياده‌دا به‌ ڕێز و پێزانينه‌وه‌ هه‌موو ئه‌و ئافره‌ته‌ بوێرانه‌ به‌بيرده‌هێنينه‌وه‌ كه‌ له‌ كاروانى خه‌باتياندا بۆ پاراستن و به‌رگرى له‌ مافه‌كانيان سه‌ريان نايه‌وه‌، يان به‌ ناهه‌ق بوونه‌ قوربانيى توندوتيژى و بيرى توندڕه‌وى و دواكه‌وتوويى. دووپاتى ده‌كه‌ينه‌وه‌ به‌ هه‌موو توانايه‌ك به‌ڕووى هه‌ر بير و وته‌ و سته‌م و ده‌ستدرێژى و هه‌راسانكردن و ناهه‌قييه‌كدا ده‌وه‌ستينه‌وه‌ كه‌ به‌رامبه‌ر به‌ ژنان بكرێت.

له‌ كاتێكدا به‌ گه‌شبينى و به‌ چاوى ئومێده‌وه‌ له‌ كارايى و به‌شدارى و هاوبه‌شيى ئافره‌تان له‌ هه‌موو بواره‌كانى ژياندا له‌ كوردستان ده‌ڕوانين، دووپاتى ده‌كه‌ينه‌وه‌ كه‌ خوازيارى زياترين و وه‌ك هه‌ميشه‌ له‌ كار و هه‌وڵ و كۆششمان به‌رده‌وام ده‌بين بۆ فه‌راهه‌مكردن و مسۆگه‌ريى زياترى ڕۆڵ و ئاماده‌يى و ده‌رفه‌ت و پێگه‌ى ئافره‌ت له‌ هه‌موو كايه‌ و بواره‌كانى ژياندا. هه‌ر لێره‌دا داواكارين لايه‌نه‌ سياسييه‌كان له‌ هه‌ڵبژاردنى داهاتوودا گرنگيى زياتر به‌ كانديدكردنى ژنان بده‌ن.

كۆمه‌ڵگه‌يه‌كى ئازاد و شارستانيى پێشكه‌وتوو كه‌ ئارام و ئاسووده‌ بێت، كه‌ نه‌وه‌يه‌كى دروست و به‌ توانا پێبگه‌يه‌نێت و داهاتوويه‌كى باشتر بنيات بنێت، به‌بێ ئازادى و يه‌كسانى و مافه‌كانى ئافره‌تان نايه‌ته‌ دى. بۆيه‌ ئه‌ركى هه‌موومانه‌ له‌سه‌ر هه‌موو ئاسته‌كانى كۆمه‌ڵگه‌ به‌م بڕوا و تێگه‌يشتنه‌وه‌، پشتيوانى له‌ خه‌باتى ژنان بكه‌ين و تا سه‌ركه‌وتن له‌گه‌ڵياندا بين.

هه‌شتى مارس له‌ هه‌مووان پيرۆز بێت.

نيچيرڤان بارزانى
سه‌رۆكى هه‌رێمى كوردستان
2024/3/8

هەواڵی پەیوەندیدار

ئاژانسی هەواڵی زاگرۆس نوێدەكرێتەوە و بە ڤێرژنێكی پێشكەوتوو وەشانی دەست پێدەكات 3

hakar herki

سەرۆک بارزانی لە رۆژی هەشتی مارس پەیامێک بڵاودەکاتەوە

سەڵاح

فوئاد حوسێن: پێشبینی دەکرێت لەم چەند ڕۆژەیە پرسی مووچە چارەسەر بکرێت

یاسین