سەنتکۆم، بارەگای فەرماندەیی ناوەندیی ویلایەتە یەکگرتووەکانی ئەمریکا دەڵێت، میلیشیاکانی گروپی حوسییەکانی یەمەن، ڕۆژی شەممە ٤ی نیسان هێرشیان کردە سەر کەشتییەکی نەوت‌هەڵگری سەر بە چین.
بەگوێرەی زانیارییەکانی سەنتکۆم، حوسییەکان لە نێوان کاتژمێر 2:50 بۆ 4:30 خولەکی سەرلەبەیانی ڕۆژی شەممە لە دەریای سوور هێرشیان کردووەتە سەر کەشتییەکی نەوت‌هەڵگری چینی بە ناوی “هوانگ پۆ” و 4 مووشەکی بالیستی دژە کەشتییان بەکارهێناوە، بەڵام ئەم مووشەکانە بەر کەشتییەکە نەکەوتوون.
ڕاپۆرتەکەی سەنتەکۆم دەشڵێت، حوسییەکان جارێکی دیکە لە کاتژمێر ٤:٢٥ی پاشنیوەڕۆ پێنجەمین مووشەکی خۆیان ئاراستەی ئەم تانکەرە کردووە و لە ڕێگاکەی ئەویش بەردەوام بووە.
هێرشی حوسییەکان بە پشتیوانی کۆماری ئیسلامی ئێران بۆ سەر کەشتییە نەوت‌هەڵگرەکەی چین لە دۆخێکدایە کە پێشتر حووسیەکان لە ڕێکەوتنێکدا لەگەڵ چین و ڕووسیا بەڵێنی دابوو هێرش نەکەنە سەر کەشتییە ترانزێتییەکانی سەر بەم دوو وڵاتە.
لە ماوەی ڕابردوودا تەنیا نەوت‌هەڵگری سەر بە وڵاتانی خۆرئاوا لە دەریای سوور کەوتوونەتە بەر هێرش.
